دجاج مندي مدخن بالجريل

عملتها اليوم بالجريل وكلها على بعضها ما اخدت وقت وبتفك زنقة للمستعجله وأعطت طعم اطيب بكتير من الفرن

وهي وحده من استعمالات الجريل السريعه للي محتاره باستخداماتها

المقادير:

• دجاجه مقطعه ومشرحه متل بالصوره عشان تمتص التتبيله 
• زيت ذره 
• بهارات مندي مدخنه 
• رز بسمتي
• بندوره مقطعه مكعبات 
• بصله مقطعه مكعبات 
• ضرس تومه 
• قرنفل حب 2 
• حب هان 
• ملح وفلفل اسود

الطريقة:

• بتبل الجاج قبل بليله ببهارات المندي المدخنه وعليهم معلقة خل وبتركها بالتلاجه 
• بمقلاة الجريل المغناطسيه بحط قطع الجاج المتبله وعليهم قدر فنجان ميا وبتركها على الواطي لمدة ساعه الا ربع او على حسب استواء الجاجه وبفتحها وبحط زيت الدره وبعلي النار وبحمرها مع التقليب 
• برفع الجاج على جنب وبحط كمان زيت ذره وبقلب بصله مع ضرس تومه لحتى الاصفرار وبضيف عليهم البندوره المفرومه وبقلبهم 
• بضيف عليهم رز بسمتي منقوع والقرنفل والحب هان ومعلقة بهارات المندي وبقلبهم وبسكب الميا عليهم وبتركها على العالي لحتى تصير الميا بمستوى الارز وبسكر المقلايه وبترمها عالهادي لحتى يستوي  
• بقدمه مع الجاج والفستق المقلي ورشة البقدونس 

لذيذ كتير بنصحكم تجربوه

رز عالفحم

المقادير:

• صدور دجاج مقطعه مكعبات 
• 2 حبة بندورة 
• فلفل اخضر
• بصلة
• 3 سن ثوم
• معلقة كبيرة معجون طاماطم 
• مكعب ماجي
• ملح 
• بهارات مشكلة 
• نص كاسة زيت ذرة 
• معلقة صغيرة دبس الرمان 
• أرز بسمتي

الطريقة:

• بنحضر جميع مكونات الصوص ماعدا دبس الرمان ونخلطهم بالخلاط او برش بالمبشرة 
• بنحط ربع كمية الصوص على قطع الدجاج بعد ما بنقلبهم وبنحمرهم بالفرن مع زيادة معلقة دبس الرمان 
• بنضيف الباقي من الصوص بطنجرة وبنقلبو وبنضيف الارز  وبنقلب وبنزيد علية الميا او مرقة الدجاج ليغمرو بمقدار نص الاصبع وبنتركو يغلي وبس تبلش تنشف الميا بنوطي وبنتركو عالهادي ليستوي 
• بنولع فحمة وبنضعها بصحن فية زيت وبنسكر فورا الغطا ليتشرب الارز والدجاج طعمة الفحمة وصة وعافيه 

فتة بالدجاج

ما بيحلى يوم الجمعة وبجمعة العيلة على السفرة الا في فتة الدجاج

المقادير:

• دجاج على حسب عدد افراد الاسرة منظف ومقطع 
• رقاق طري( يسمى بالشراك )
• أرز بسمتي
• بصل مقطع مربعات 
• فستق 
• سماق
• ملح 
• لتتبيلة الدجاج: بابريكا 
• توابل الدجاج 
• ملح 
• ليمون 
• سماق 
• توم بودره وبصل بودره 
• للدقة:ضرس تومه 
• ليمون 
• فلفل اخضر
• ملح 

الطريقة:

• نسلق الدجاج مع المطيبات 
• بنفلفل الارز وبنضيف عليه من مرقة الدجاج والملح 
• بنقطع الرقاق الى قطع وتوضع في صحن التقديم وبنشربو بمرقة الدجاج 
• بعد 3 دقايق من تشريب الرقاق بنسكب الارز عليه وبنفردو ليغطي كل الرقاق 
• بنضع فوقه تتبيلة البصل:بمقلاة عالنار وفيها زيت الذرة بنقلب البصل ليدبل شوي وبنضيف السماق والملح والفلفل الاسود وشوية مرقة دجاج وبنغطيه ليستوي 
• بنتبل الدجاج بالبهارات وبنحمرو بالفرن لياخد لون محمر وبنصفو على الفته وبنزين بالفستق المقلي 
• بنقدم جنبها دقة الفلفل :بالزبدية الفخار بندق التومه مع الفلفل الاخضر وبعدين بنعصر فوقها الليمون ورشة الملح 

القرع المحشي

اليوم أكلتنا مو كتير بيعرفوها وممكن يستغربو منها بس بحب أقولكم انها كتيررر زاكيه وفكره جديدة ممكن تقدميها بالعزايم تخرجي فيها عن المعتاد بسفرتك

المقادير:

• قرعة حجم متوسط 
• رز بسمتي
• لحمة مفرومة 
• جزر مقطع مكعبات 
• بصله 
• بازيلا 
• مكسرات للتزيين
• ملح وفلفل اسود
• بهار الاوزي

الطريقة:

• بنفتح القرعة من فوق لنعمل فتحه بندخل منها الرز وبفضي جواتها من البزر والألياف وبغسلها منيح 
• تتبل بالملح والفلفل الاسود ورشة سكر وبتركها على جنب
• بمقلاة على النار بوضع زيت ذرة وعليه البصل المفروم وبقلبو لحد ما يدبل وبنضيف اللحمة المفرومة وببهرها بالبهارات 
• برفعها عن النار بس تستوي وبحضر طنجرة تانيه وبحط معلقة سمنه او زيت ذرة وبقلب فيها كمان بصله مقطعه لحتى تدبل تماما بس ما تتحمر وبضيف الرز وبقلب وبهارات الاوزي والملح والفلفل الاسود والجزر والبازيلا ونص خليط اللحمة المفرومه وبغمرو بالميا للحد الي بس يخليه يستوي نص استواء ضروري عشان ما يخبص معنا بالقرعه 
• بس يستوي الرز بجيب القرعه وببدا احشيها وبمسحها بزيت الذرة من برا وبغلفها كلها بالقصدير وبحطها بصينية وبدخلها الفرن 
• بتاخد من ساعة ونص لساعتين واكيد نار هادية 
• وبس اقدمها برش بقية اللحمة المفرومه والمكسرات على باقي الرز اذا زاد من الحشوة بعد ما بكون رجعت ضفت عليه ميا وبخليه يكمل سواه 
• جربوها طيبة فيها شوية حلاوة من القرع مع ملوحة الرز 

سفرة افطارنا الكبسة والدقوس

 صلصة الدقوس وخيار بلبن

الكبسة ذكرت طريقتها سابقا اما صوص الدقوس فهو يقدم بجانب الكبسة وبكون حار ومنو مطبوخ ومنو بيكون عمايلو عالبارد انا اليوم عملتو على النار

المقادير:

• بندورة مقطعة ناعم 
• فلفل اخضر مفروك ناعم
• بصله مفرومه ناعم
• فلفل احمر ناشف مطحون (شطة حارة)
• صلصة بندورة

بمقلاة عالنار بنقلب البصلة بزيت الذرة وبس تدبل بنضيف الفلفل الاخضر وبنقلب وبعدين البندورة وبس يدبل الخليط بضيف الصلصة والملح والشطة والفلفل الاسود ورخيها بشوية ميا وبتركها تتسبك عالنار
تقدم باردة

خيار بلبن :

• خيار مبروش ناعم 
• لبن زبادي
• توم بودرة 
• ملح

تخلط جميع المقادير مع بعض

المجدرة

المجدرة "أكلة مقدرة" وهي طبخة شامية مشهورة في بلاد الشام والمنطقة العربية المجاورة، ففي سورية والأردن وفلسطين يسمونها المجدرة وفي لبنان يسمونها المدردرة، أما المصريون فيسمونها الكُشري، وهذه الأكلة ذات أصل واحد، لكن لها في كل بلدٍ اسـم مختلف وطريقة طهو تختلف بين منطقة وأخرى فيما يضاف إليها من زيوت طبيعية، وهذه الزيوت تتراوح ما بين السمن العادي والسمن العربي إلى زيت الزيتون وقدر من المنكهات، وتٌطبخ إما مع الأرز أو البرغل مع وجود العدس الأسمر لأنه أساس صناعة المجدرة، ويتم تناول مع هذا الطبق المخللات بأنواعها، لبن الزبادي، أو السلطة.

ويعتبر العدس من أغنى البقوليات من حيث العناصر الغذائية، اذ يعادل اللحم في قيمته الغذائية بل يفوقه في بعض النواحي، فهو يحتوي على ماء وبروتين وكربوهيدرات ونسبة قليلة من الدهون غير المضرة مثل تلك التي توجد في اللحوم، فضلا عن نسبة عالية من الحديد المفيد لعلاج فقر الدم، والكالسيوم والفسفور وفيتامين (أ) المفيد لصحة الجلد والعيون والعظام، وفيتامين (ب1) و(ب2) و(ب6)، اضافة الى البوتاسيوم والماغنيسيوم والنحاس والفسفور والكبريت والكلور والألياف التي يحتاج اليها الجسم ليستمد منها قوته وتنظم امتصاص الامعاء للسكريات في الوقت ذاته. هذا عدا أنه غذاء سهل الهضم وسريع الامتصاص ويساهم في توازن معدل السكر في الدم مما يغني مرضى السكري عن تناول الأنسولين الذي يحتاجونه لنقل الغذاء اإلى الأنسجة، وقد استخدمه القدماء في الطب وقالوا أن قشره شاف.

كما أظهرت الدراسات أن تناول العدس أربع مرات في الأسبوع كغذاء بديل عن اللحم يساهم في خفض معدل الكوليسترول ويحمي القلب ويقلل خطر تعرض الجسم للأزمات والمشاكل الصحية الخطيرة كداء السكري وارتفاع ضغط الدم، علما أن هذا النوع من البقوليات لا يناسب المصابين بأمراض المعدة والكبد والكلى والمرارة والراغبين في تخفيف الوزن.

واليوم حبيت أطل عليكم بالمجدرة ومتل ما بيحكو عنها "المجدرة أكلة مقدرة" والشي اللي ممكن يكون مو الكل بياكلو معها هي "السلطة" بنصحكم تجربوها كتيررر طيبة، وإليكم طريقة تحضيرها:

المقادير:

• عدس حب بني 
• بصل مقطع جوانح
• أرز بسمتي أو أي نوع أرز ذو حبة طويلة
• كمون
• ملح 
• فلفل اسود

للسلطة :

• بندورة (طماطم)
• فلفل اخضر
• ثوم
• نعنع ناشف 
• ملح
• ليمون

الطريقة:

• يسلق العدس مع بصلة مقطعة مكعبات.
• يضاف لماء السلق بعد ما ينضج العدس رشة كمون وملح ورشة فلفل اسود ونتركهم يغلو مع بعض ثم نضع الارز عليهم وننتظر الى ان يجف الماء عن مستوى الارز ثم نخفف من درجة النار (لو كان ماء السلق قليل نزيده ونضبط العيار المناسب للارز)
• يقطع البصل جوانح ونفركهم بطحين وملح ونتركهم حوالي النصف ساعة حتى نحصل على القرمشة ثم نقليهم بمقلاة فيها زيت غزير ونقلبهم لحتى ما يلزقو مع بعض.
• نرفعم من الزيت عندما يصبح لونهم ذهبي ونضعهم على صحن فيه ورق مطبخ ونأخذ ملعقتين من الزيت اللي قلينا فيه  البصل وونضعه على الارز
• نقوم بسكب المجدرة في صحن التقديم ونضع فوقها البصل المقلي.

السلطة:

• في الزبدية الفخار يدق فص ثوم مع فلفل اخضر مقطع لحتى يفرمو بشكل جيد ويضاف عليهم البندروة المقطعة وندقها مع الخليط واخر شي يضاف النعنع الناشف وربع معلقة ليمون وملح ثم نحرك.

الرز الكابلي

المقادير:

• جاجة منظفة ومقطعة 
• رز بسمتي 
• معلقة صلصة طماطم 
• بندورة مقطعة 
•  تومة 
• بصل
• زعفران 
• البهارات المطحونة  (كزبرة  كمون  قرنفل  فلفل اسود  زنجبيل اخضر  قرفة  بهار حلو )

الطريقة:

• بنسلق الجاج مع المطيبات (بصله حب هان عود قرفة ورق غار)
• بالخلاط بنحط لكل كاستين رز معلقة من البهارت المطحونة مع راس ثومة ومعلقة صلصة والبندورة ونص كاسة  مرقة الجاج وبنخلطهم ليصيرو ناعمين 
• بنسلق الرز بمرقة الجاج مع الملح والزيت ولازم تكون المرقة كتيرة وبس نص سلقة 
• بطنجرة عالنار بقلب راسين بصل لكاستين رز بزيت وسمنة مع بهارات صحيحة (ورق غار وهيل وقرفة وقرنفل ) بس يدبل بضيف الخليط اللي خلطانة بالخلاط وبعد دقايق الجاج وبنظبط الملح وبحركهم مع الخليط 
• بضيف الرز بعد ما صفيناه وبتركو نص ساعة على نار واطية بدون تحريك 
• بناخد صحن من الرز اللي على وجه الطنجرة وبنلونه بالزعفران وبنحرك الرز الي بالطنجرة من تحت لفوق 
• بسكب الرز بصحن التقديم وفوقو الرز الاصفران وعليه الجاج والمكسرات

المقلوبة

المقادير:

• جاجة مقطعة 
• بطاطا مقطعة دواير
• باذنجان مقطع دواير ومقشر حزوز
• بندورة مقطعة دواير
• بصل مقطع جوانح
• رز بسمتي منقوع
• ملح 
• فلفل اسود
• هيل
• ورق غار

الطريقة:

• بنقلي الجاج بعد تنظيفة طبعا مجرد تحمير الوجه وبعدين بنسلقة بالمطيبات (ورق الغار وبصلة والهيل الحب)
• بنقلي الباتنجان والبطاطا والبصل وبنحطهم على ورق نشاف لامتصاص الزيت الفائض بعد القلي
• بطنجرة برص الجاج والبندورة وبعدين البطاط والبتنجان والبصل وبعدين بضيف الرز المنقوع والمبهر وبسكب مرقة الجاج بهدوء مشان ما ترتفع الخضار لفوق 
• بحط صحن وعلى النار اول شي على العالي لحتى تغلي وتنشف المرقة ةتصير لمستوى الرز وبوطي النار وبتركها على نار هادية 
• اهم شي مشان تطلع معك متل القالب بعد ماتستوي اطفي عليها وخليها لمدة ربع ساعة وبعدين اقلبيها 
• تقدم بجانبها السلطة الخضرا ولبن بخيار

صُرر الأوزي

طريقة تحضير رقائق عجين الأوزي:

المقادير:

• 3 أكواب طحين
• كوب ماء دافئ
• ملعقة كبيرة زيت نباتي
• ملعقة صغيرة ملح طعام
• بيضة

الطريقة:

• تخلط جميع المقادير وتترك ساعة بمكان دافئ لتختمر.
• تقطع إلى قطع مع كمية وفيرة من النشا وتترك نص ساعة.
• ثم نبدأ بفرد العجين بالزيت أو السمنة بالأصابع بشكل أسطواني ولفها كشكل الرول وتركها لمدة نص ساعة.
• ثم توضع قطع العجين بشكل طولي وتفرد بواسطة زيت أو سمنة حتى تصبح بشكل رقائق.
• توضع الرقاقة بصحن وتوضع المكسرات (حسب الرغبة) داخلها ثم توضع الحشوة وتلف أطرافها المتبقية وتقلب بالصينية وتوضع بالفرن.

الحشوة: تقلب على النار بازيلاء وجزر مقطع إلى قطع صغيرة مع لحمة ناعمة وبعد استوائها نص استواء يوضع الرز ومقدار الماء الكافي لكمية الرز مع ملح وبهارات الأوزي، ثم يترك على نار هادئة حتى ينضج.

ملاحظة: طريقة فرد عجين الأوزي شبيه بطريقة فرد عجينية الشعيبيات.

الكبسة

رجعتلكم بوصفة خليجية من السعودية واخترت الكبسة ..

المقادير:

• دجاج مسلوق بالمطيبات 
• ارز امريكي 
• جزر
• بندورة
• بصل
• توم
• صلصة طماطم
•  بهارات الكبسة خشنة وناعمة اذا لم تتوفر جاهزة بامكانك اضافة هذة البهارات (قرنفل حب -حب هان -كمون حب-كزبرة حب-لومي -فلفل اسودحب-بهارت مشكلة حب-ورق غار _قرفة اعواد)

الطريقة:

• نسلق الدجاج بالمطيبات من ورق غار وحب هان ونضع بهارت الكبسة الخشنة فقط
• في طنجرة عالنار نضع زيت ذرة ونقلب البصل المقطع والثوم المهروس الى ان يدبل ونضيف الجنزبيل المبشور الفريش اذا لم يتوفر يمكن الاستعاضة عنة بالبودر او الناشف
• نضيف عليه الطماطم المقطعة ونقلب ومن ثم الجزر المبشور بس نشوفو دبل شوي بنضيف معلقة صلصة الطماطم ونغمر بمياة السلق وننضيف معلقة من بهارات الكبسة البودرة 
• نتركها تغلي لمدة 10 دقايق الى ان تتسبك مع اضافة قطع الدجاج وعند اضافة الارز بنشيلهم
• نضع الارز الامريكي المغسول ونقلب ونتركها تغلي الى ان يقل منسوب المياه على الارز ونوطي النار ونتركها تستوي على راحتها
• نقلي الدجاج ونسكب الارز ويفضل تركها 5 دقايق قبل السكب وتزين بالمكسرات والزبيب والجزر المبشور والمقلي 
• تقدم بجانبها الدقوس الحار 

جربوها طيبة كتيير

كشري

الطريقة:

• نسلق معكرونة

• الصلصه للكشري:
• نقدح الزيت ونضيف عصير طماطم متصفي وتوم مهروس مع ملح وكمون وكزبره وشويه صغيرين خل هنضيفهم للصلصه بعد الغليان
• وهنطفي عليها بعد ما تتقل شويه مش تتسبك تماما
•  نيجي للرز والعدس:
  العدس بجبه ننقيه ونغسله كويس نسلقه نص سلقه ونصفيه
• بطنجرة عالنار نضيف الرز ونقلب كويس ليتفلفل ونضيف ماء كل كوب رز كوب ماءونتبل بقليل من الكمون والفلفل وطبعا ملح
•  نقطع بصلتين نص حلقات وندعكهم بشوية ملح عشان يطلع مقرمش نسخن زيت غزير ونقلي البصل لحد اللون الدهبي
  ونصفيه علي ورق المطبخ
•  الدقه :
  3 فصوص توم مهروسين مع ملح وكمون وكسبره ناشفه هنضيف لهم عصير ليمونتين وربع كوب خل 
  وشويه ميه مع ملعقة  صغيرة صلصه من  الكشري لتعطيها لون كويس نغليهم 3 دقايق علي النار

رز الصيادية وسمك

طريقة عمل أرز الصيادية:

• نقطع بصلة كبيرة مربعات ونقليها في طنجرة مع زيت الذرة ويقلب الى أن يأخذ اللون البني المحروق (كل ما زادت درجة احتراقه اعطانا لون أحمر داكن )
• بنضيف الماء والملح والفلفل الاسود والبهار والقرفة ورشة حب هان مطحون ونتركه يغلي لمدة 10 دقايق
• يضاف الارز البسمتي المغسول والمنقوع ويقلب اذا كان منسوب الماء قل بنضيف حسب احتياج الارز وبنتركه يغلي وبنهدي النار عليه الى الاستواء

- يقدم بجانب السمك المقلي او المشوي وصحتين وعافية

أكلة سريعة

حبيت اسميها الاكلة السريعة لانها سهلة وما بتاخد وقت وخصوصا للامهات العاملات او الي زنقها الوقت فماعليكي الا انو تطولي صدور الجاج وخضرا زي البصل والفلفل الرومي الملون والجزر وأي خضرا متوفره عند ست البيت وتقدم مع الارز والمكسرات لذيذه وسريعه ومشبعه بنفس الوقت

المقادير:

• صدور دجاج
• فلفل رومي ملون
• بصل مقطع جوانح
• جزر مقطع طولي
• بهارات (ملح وفلفل اسود وتوم بودره وبهارات الدجاج )

الطريقة:

• في طنجره عالنار بقلب قطع الصدور بمازولا لحد الاستواء ونتبلها بالملح والفلفل الاسود وبهارات الدجاج
• نضيف عليها الجزر ونقلب لدقيقه ومن ثم البصل ونقلب ومن ثم الفلفل الرومي بجميع ألوانه ونقلب ..نحافظ على قرمشه الخضار قليلا ما بدنا اياها دايبه
• بنفلفل رز وعند استواءه بنعمل حرف x على سطح الطنجره بالكركم المذوب بالماء ولا نحرك الا بعد 5 دقايق بصير عنا لون الرز أصفر وأبيض
• نسكب الارز وفوقه الخلطة (ممكن اضافة اي نوع خضار اخرى غير المذكوره) ونزين بالفستق المقلي او اللوز
• وصحه وعافية

الأوزي

المقادير :

• لحمة مفرومه 
• بصل
• خضار (جزر مقطع مكعبات _بطاطا مقطعه مكعبات_بازيلا )
• رز بسمتي
• بهارات الاوزي وملح وفلفل اسود

الطريقة:

• بمقلاة عالنار نضع الزيت ونقلب البصلة المقطعه مربعات الى ان تذبل ونضع عليها اللحمة المفرومة ونبهرها ونملح وانا بضيف عليها رشة كاري بتعطي طعم مميز 
• نسلق الخضار وبمقلاة نضع القليل من الزيت ونقلب فيها الخضار بعد السلق ونبهرها ببهارات الاوزي 
• بطنجرة عالنار نضيف زيت المازولا ونقلب فيها بصلة مقطعه الى ان تذبل ونضيف الارز المنقوع سابقا ونقلب الى ان نحس بأن كل رزه اخدت من الزيت ونضيف الماء (انا ما بعاير الماء من حكم خبرتي بطبخ الارز ) ونبهر ببهارات الاوزي والملح 
• عند الاستواء نسكب الارز وفوقه الخضار واللحمه المفرومه ولكي حرية الاختيار في تزيين الطبق ونضع اللوز المقلي وما يحلو لكي من المكسرات 
• يقدم بجانب الدقه عبارة عن فلفل أخضر مدقوق وعليه عصير ليمونه وملح