صفيحة لحمة

المقادير:

• للصفيحة /لحمة مفرومة
• بصل
• بندورة 
• فلفل اخضر
• طحينة
• معلقة لبن 
• ملح 
• فلفل اسود
• ليمون 
• للجبنة/جبنة صفرا
• زيتون 
• فلفل رومي 

الطريقة:

• عملتهم بعجينتي المعتمدة عجينة العشر دقايق وذكرت طريقتها من قبل بوصفات تانيه بتلاقوها موجودة
• بنقلب بصلة بزيت الذرة لحتى تدبل وبضيف عليها اللحمة المفرومه وبقلبها لحتى تستوي نص استواء لانو بدي احطها لسه بالفرن وما بدي تنشف وبضيف الملح والفلفل الاسود والبندورة والفلفل الاخضر وبقلب وبطفي 
• بضيف الطحينة ومعلقة اللبن والليمون وهيك بتكون جاهزة للحشي 
• بفرد العجينة وبقطعها دواير وبحط عليها خلطة اللحمة وبصفهم بصينية الفرن وبدخلها لحتى تستوي وبحمرها من فوق تحمير خفيف 

للجبنة:

• ببرش الجبنة وبضيفها على العجينة بعد ما بقطعها دوائر وانا هون زينتها بطريقة ترغيب للاطفال لياكلوها وعالفرن وصحة وعافيه

بيتزا

بيتزا بالخضار وبيتزا محشية الاطراف بالجبنة ...عملتها بعجينة العشر دقايق الي كل بيت تقريبا صار بيعرفها وانا بعتمدها بكل معجناتي مع اضافة لمساتي لتصير طرية والاطراف مقرمشة 

المقادير للعجينة :

• 5 كوب طحين 
• 2 كوب ماء دافئ
• ربع كوب زيت زيتون ( بستعمل للبيتزا زيت الزيتون وللمعجنات زيت الذرة )
• 2 معلقة كبيرة خميره
• معلقة كبيرة سكر
• معلقة ملح 
• معلقة كبيرة حليب بودرة

للحشوة:

• صوص البيتزا بحضرو :
• بصله مقطعه صغير
• صلصة طماطم 
• توم بودرة
• بصل بودرة 
• ملح 
• بابريكا
• اوريغانو 
• رشة سكر 
• كاتشب
• فلفل رومي ملون مقطع جوانح رفيعه 
• زيتون اسود
• فطر
• جبنة مازرولا وقشقوان

الطريقة:

• بالنسبة للعجين : في وعاء العجين او العجانه بضيف 2 كوب الطحين من ال5 وعليهم الخميرة والسكر والحليب البوردة و2 كوب ماء دافئ بحركهم وبتركهم لمدة 10 دقايق 
• بنلاقي السائل صار في فقاعات بضيف عليهم 3 كوب الطحين المتبقي والتوم البودرة وزيت الزيتون وبعجن لحتى تتكون عندي عجينة ملساء وممكن تحتاجي اضافة طحين اذا كانت بتلزق بالايد

• لتحضير الصوص:في مقلاة بضيف الزيت وبدبل البصله لحت الاصفرار بضيف عليهم الصلصة والبهارات المذكورة وبرخيها بالميا وبتركها تتسبك وبطفي وبضيف عليها الكاتشب وبتركها تبرد 
• بفرد العجينه على مقاس الصينية وبحط الصوص وبعدين الفلفل الرومي والفطر والجبنة المبشورة والزيتون الاسود 
• بدخلها الفرن لحتى تستوي البيتزا وتتحمر من تحت وبرفعها تتحمر من فوق 
• بالنسبة للبيتزا المحشية الاطراف بحط جبنة على اطرافها وبسكرها منيح وبتابع نفس الخطوات السابقة 

فطيرة الدجاج وسلطة البرغل

المقادير للفطيرة :

العجينة ...

•  كاسة طحين
• معلقة كبيرة سكر
• معلقة صغيرة ملح
• معلقتين خميرة
• ربع كاسة زيت ذرة 
• نعجن المكونات مع بعض بميا دافية  ونتركها ترتاح نص ساعة 

الحشوة:

• صدور دجاج مقطعة بنقلبها عالنار وبنضيف عليها بصل مقطع جوانح بس يدبل شوي بضيف فلفل رومي ملون ومقطع جوانح رفيعة  وجزر مبشور بنقلبهم مع بعض وبضيف ملح وفلفل اسود وبهار دجاج وتوم بودرة وبصل بودرة 
• بنقطع العجينة لنصين وبفرد النص الاول بصينية مدهونة بزيت وبفرد الحشوة لمن تبرد عليها وبضيف جبنة صفرا وبفرد النص التاني من العجينة وبسكرها منيح وبرش جبنة موزريلا على الوجة لو كانت الوجه مسكر بس لو عملتوها متلي بالشبك بتدهنو الوجه بالحليب  مع سمسم وحبة البركة 
• بدخلها الفرن لحتى تستوي وتتحمر

المقادير لسلطة البرغل :

• برغل خشن 
• بقدونس 
• بندورة 
• بصل 
• زيت زيتون 
• ملح 
• جوز

الطريقة:

• بننقع البرغل بالميا نص ساعة وبنصفيه وبضيف عليه بندورة مفرومة وبصل مفروم وبقدونس مفروم 
• بنعصر ليمون  وملح وزيت زيتون 
• بنزين بالجوز المفروم خشن 

طيبة كتير وبتختلف نهائي عن التبولة على الرغم من انها نفس المكونات بس بدنا نقلل كمية البقدونس وبنكتر البرغل.

سمبوسك

السمبوسك أو السمبوسة أو السنبوسك أو السنبوسة من أشهر الأطباق الجانبية التي تقدم في موائد رمضان، ويعتقد أن السمبوسك أو السمبوسة نشأت في منطقة الشرق الأوسط في حوالي القرن العاشر الميلادي وإنتقلت فيما بعد عبر التجار المسلمين إلى شبه القارة الهندية، وكثير من المؤرخين قد ذكروها في كتبهم لما وجدوه عند النبلاء والأمراء من إحتفاء بهذه اللفائف المحشوة بأطايب اللحوم والسمن والخضار.

ومن بين السلاطين العظام الذين ذكرت السمبوسة في موائدهم الشاه محمد بن تغلق وهو واحد من أشهر سلاطين الهند في القرن السابع الهجري، وقد ذكر إبن بطوطة الرحالة الشهير كيف كان هذا الطبق الجانبي مدللًا في بلاط السلاطين، فمرة محشو باللحم والخضار، ومرة محشوة باللوز والفستق والجوز كما حال القطائف التي نعرفها اليوم.

ورغم إختلاف الرواة في أصل هذا الطبق الشهيّ، إلا أنه لابد من الإشارة إلى دور الإستعمار البريطاني الذي سيطر طويلًا على منطقة الهند في نشر ثقافة السمبوسك في دول العالم التي تقع تحت الإنتداب من أقصاه إلى أقصاه مرورًا بالحجاز واليمن.

أما في الأندلس فقد كانت معروفة أيضًا كما في المشرق، وكانت تسمى بالجوداية أو السنبوسك بالنون، أو السنبوسج بالجيم، وقد اشتهر في المشرق أن رقائق السمبوسة التي نعرفها اليوم كانت تحشى باللحم والبيض، بينما السمبوسة في الأندلس كانت محشوة بالثوم والتوابل مخلوطة باللحم، أو بالسكر واللوز ثم تقلى على شكل مثلثات، وفي إسبانيا حتى هذه اللحظة مازالت السمبوسة موجودة كإرث حضاري، وتعرف بسم إنبنادياس.

وتحضر السمبوسك كذلك في الموروث الثقافي العربي، بالمغرب مثلا تسمى بيريوات وهي واحدة من الأكلات الأكثر شيوعًا هناك، محشية باللوز والمكسرات ومقلية بالزيت، وفي الجزائر العريق تعرف باسم البورك، ويقال أن الدولة العثمانية إستجلبت هذا الطبق معها إلى شمال إفريقيا إبان عدة فترات تاريخية، أما في تونس فيسمى بالبريك دنوني.

ومما يشاع إلى أن أصل هذه السمبوسة التونسية يعود لعائلة أندلسية إستقرت في تونس بعد سقوط بلادهم، لكن يرجح آخرون إلى أن جذرها يعود للتركة العثمانية، الشيء الوحيد الذي لن نختلف عليه أن هذا السمبوسك التي نذوب في غرامها عند كل رمضان فرضت حضورها التام في اللحظة والآن حتى أنستنا الماضي والتاريخ.

بدي أطل عليكم بصحن يكاد لا تخلو منه سفرة رمضانية .. السمبوسك وبعجينة مقرمشة وهشه وما بتشرب زيت وحشوتها اليوم بجبنة واكيد فيكم تحشوها بالحشوات المختلفة للسمبوسك، وإليكم طريقة اعدادها:

المقادير:

• 3 كاسات طحين (دقيق)
• نصف كاسة نشا
• نصف كاسة مازولا (زيت قلي)
• كاسة ماء دافئ او حسب ما تحتاج العجينة 
• رشة ملح 
• رشة سكر

الطريقة:

• نقوم بنخل الطحين مع النشا والسكر والملح
• يضاف الزيت ونفرك بأيدينا الى ان يصبح الطحين مشبعاً بالمازولا
• نبدا بإضافة الماء بالتدريج ونعجن الى ان يصبح لدينا عجينة ناعمة ما بتلزق باليد
• تغطى وتترك على جنب في حين تحضير الحشوة

الحشوة:

• ملعقتين زيت ذرة
• معلقة واحدة طحين 
• يضاف الزيت الى الطحين ويحركو مع بعض ونضيف عليهم نصف كاسة حليب و2 كوب جبنة موزاريلا مبشورة ويضع الخليط على النار النار حتى تسيح الجبنة وتختلط المكونات مع بعض ثم نضيف ملعقة حبة البركة (حسب الرغبة)
• نقوم برق العجينة بسمك رقيق ونحشوها بعد ان تبرد الحشوة ونضعها على صينية فيها طحين لكي لا تلتصق ثم نقليها بزيت غزير

فطيرة السبانخ الحلزونية

فطيرة روسية وبتركيا بسموها برك

المقادير:

• 3 كاسات طحين
• بيضة
• ملعقة كبيرة خميرة
• ملعقتين كبيرتين لبن (زبادي)
• ملعقة كبية زيت
• كأس ماء دافئ او كأس حليب او حسب حاجة العجينة قد تحتاج اكثر او اقل
• ملعقة كبيرة سكر
• رشة ملح

الحشوة:

• جبنة موزاريلا او قشقوان ويمكن ان تستعملي اي نوع لديك
• نصف كيلو سبانخ
• ملح
• فلفل
• بصلة
• ليمون
• دبس رمان ورمان حب
• يمكنك ان تتفنني بالحشوة حسب الرغبة

الطريقة:

• نعجن مقادير العجينة ونتركها ترتاح نص ساعة
• نفرد العجينة على شكل دائري ونقطع بالسكين بالطول مستطيلات رفيعة ثم نبدأ بلف كل مستطيل على شكل رول ونصفه بالصينية ومن وين انا انتهيت بوصل العجينة لحتى يصير عنا شكل حلزوني وبدهن الوجه بصفار بيضة مع رشة نسكافيه ونرش سمسم
• ندخلها الفرن الى ان تنضج ثم نقوم بتحميرها

بيتزا

المقادير:

لتحضير الصلصة :

• بندورة مقطعة 
• بصل
• اوريغانو
• توم بودرة 
• بصل بودرة 
• توابل البيتزا
• ملح 
• فلفل اسود
• بابريكا
• كاتشب 
• صلصة 
• ماء

للعجينة :

• بعتمد في تحضير معجناتي بأكملها عجينة ال 10 دقايق كتير هشة وطرية حتى تاني يوم 

مكونات البيتزا :

• فلفل رومي ملون مقطع شرايح رفيعة 
• فطر
• جبنة مازرولا وقشقوان 
• زيتون 

الطريقة:

• للصلصة / بقلب البصلة عالنار مع زيت الذرة لحتى تدبل وبضيف البندورة وبقلب لحتى تدوب وتنهرس وبضيف الصلصة والبهارات والميا وبخليها تغلي على نار عالية 10 دقاايق وبوطي لحتى تتسبك وبطفي عليها وبضيف الكاتشب وهيك بتصير جاهزة وبتركها لحتى تبرد وبخلطها بالخلاط وممكن تتركيها زي ماهيا 

• للعجين / بعجن العجينة و(انشاء الله حنزل لاحقا مكونات العجينة وطريقة تحضيرها بملف ) وبفردها دائرة وبقطع حوافها بالسكين وبصير بتنيهم زبدهن وجهها بالصلصة وبوزع الفلفل الرومي والفطر والزتون وبرش الجبنة وبدخلها الفرن لتستوي وبحمرها 

محوى السبانخ

أكلة بيشتهر فيها اهل غزة من فلسطين

فيها شغل وتعب بس بالاخر على اول لقمة بتنسي هالتعب والارهاق كلو

المقادير:

• سبانخ مغسل ومفروم 
• بصل مقطع 
• زيت زيتون 
• زيت نباتي
• طحين 
• ميا دافيه 
• نشا
• ملح 
• فلفل احمر 
• ليمون 

الطريقة:

• بنرش على السبانخ ملح وبنحطو بمصفاية وبتركو شي ربع لنصف ساعة لتنزل كل ميتو
• بندبل البصل المفروم بمقلاة عالنار بزيت الزيتون 
• بنضيف البصل على السبانخ والملح والفلفل الاحمر (في بلدان بتسمية هريسة ) والليمون وبنقلب طبعا الملوحة والحمض بيعتمد على زوق ست البيت انا بالنسبة لالي بحبو حامض وحار كتير

بانسبة للعجينة:

• عملت 3 كبايات طحين ورشة ملح ومعلقة نشا مشان ما تنمزع معنا العجينة وقت الفرد وبضيف عليها الميا الدافية بالتدريج لحتى تصير معي عجينة متماسكة وما بتلزق بالايد 
• بتركها ترتاح لمدة ساعة لساعتين افضل مشان ماتغلب معاكي بالفرد 
• بقطعها كور وبصفهم بصحن في زيت نباتي  الحد الي بيغطي كور العجين وبتركهم يرتاحو ساعة زمن 
• باخد كورة العجينة وبفردها بايدي طبعا حتفرد معي بسهولة لانها مرتاحة وبرقها لتصير شفافة وبقطعها من النص وطول ما انا رقها بدهن ايدي زيت وبرق
• بحط الحشوة على طول العجينة وببدا ألفها متل الرول الرفيع وبعدين بشكلها متل الحلزون 
• توضع جميع الحبات بعد التشكيل في صينية مدهونة بالزيت 
• تخبز بفرن حامي وصحة وهنا

أقماع الشاورما

عجينتي المعتمدة ال10 دقايق بقطعها قطع مستطيلة وبلفها على اقماع مخصوصة وبدهنها بحليب وبرش سمسم وحبة البركة وبدخلها الفرن الى الاستواء

الحشوة:

• صدور دجاج مقطعة ومتبلة ببهارات الشاورما بقلبها على النار لحد ما تستوي
• بحشيها بالاقماع بعد ماتبرد مع بصل مخلوط بالسماق
• تقدم بجانبها الطحينة او التوميه

تشكيلة معجنات

العجينة المعتمدة لدي بجميع معجناتي هي عجينة ا10ل دقايق  طرية حتى تاني يوم
الحشوات عبارة عن :
وردة الجبنه
صفيحة لحمه
رولات الزعتر
لبنة بالفلفل الاحمر الحار

الفطيرة التركية

 
المقادير للعجينة :

• 2كوب طحين
• 1/2معلقة صغيره سكر
• ملح 
• 2معلقة صغيرة خميرة 
• كوب حليب سائل دافئ 

المقادير للحشوة :

• لحمة مفرومة 
• بصل 
• جزر
• بازيلا 
• بندورة مقطعة مكعبات
• جبنة قشقوان وموزارولا وشدر

الطريقة:

• نخلط جميع مكونات العجينة مع مراعاة صب الحليب بالتدريج لانو كل نوع طحين بياخد مقدار معين مو شرط نفس المذكور بالوصفة وممكن يزيد عن الكوب
• نتركها تختمر مدة نص ساعة
• نقسم العجينة الى نصفين ..النص الاول يفرد على الصينية المدهونه بالزيت ونضع الحشوة وعلى وجهها نضع نوعين الجبنة القشقوان والشيدر
• نفرد فوقها النص التاني من العجينة وبسكر الاطراف وعلى وجه العجينة كمان نضع الجبنة ورشة سمسم وحبة البركة 
• توضع بالفرن من ربع ساعة الى نص ساعة وتحمر 

الطريقة للحشوة:

• بندبل البصل المقطع بمقلاة على النارفيها زيت نباتي وبنضع اللحمة المفرومة والملح والفلفل الاسود والكاري والبهارات ومن ثم الجزر المقطع والبازيلا وقطع البندورة وتترك لحد الاستواء

ملاحظة:

• انا عملت مقدارين من العجينة لصينيتي 
• ممكن التغيير بالحشوة بدل اللحمة ممكن صدور دجاج

بيتزا