فاصوليا خضرا بالطحينة

تعددت طرق طبخ الفاصوليا ومن ضمنها  الفاصوليا الخضرا بالبندورة ..لكن المره هاي حبيت أغير بطريقة طبخها وكالعادة بحب أجرب شي جديد

وعملتها مع الطحينة البيضا والليمون وكانت النتيجة لذيذة

المقادير:

• نص كيلو فاصوليا خضرا مغسولة ومقمعه ومقطعه .
• لحمة عجل مقطعة مكعبات.
• طحينة بيضاء
• بصلة مقطعة ناعم.
• عصير ليمون.
• ملح.

الطريقة:

• تسلق اللحمة مع المطيبات (ورق الغار وحب هان وبصلة صغيرة).
• بطنجرة تانيه بقلب البصلة بزيت الذرة لحتى تدبل وبضيف عليها الفاصوليا .
• بضيف اللحمة ومرقتهاعلى الفاصوليا وبتركها عشر دقايق على نار عاليه وبعدين بوطي لحتى تستوي. 
• بحل الطحينة مع ميا وبزبط الملح والليمون وبضيفها على الفاصوليا وبتركها عشر دقايق لحتى تتسبك مع الفاصوليا.
• بقدمها مع الرز الابيض وصحتين وعافية.

شوربة العدس بالكاري مع الخبز الهندي

المقادير للشوربة:

• كوب عدس مجروس مغسول كتير منيح ومصفى.
• بصلة مفرومه ناعم.
• جزرة مبشورة.
• حبة بطاطا مقطعه مكعبات.
• معلقة كبيرة صلصة طماطم.
• 2 حبة بندورة مقطعة صغير.
• معلقة صغيرة كاري.
• معلقة صغيرة كمون بودرة.
• معلقة صغيرة كركم.
• مكعب مرق دجاج.
• ماء.

الطريقة:

• بطنجرة على النار بدبل البصله وبضيف الجزر والبطاطا وباقي المكونات وبقلبهم مع بعض.
• وبضيف البهارات والمكعب والميا الساخنه وبتركها لتستوي على النار 
• بقدمها من غير تنعيم على الخلاط .

بالنسبة لمقادير الخبز الهندي:

• 3 كوب طحين .
• ربع كوب زيت ساخن .
• معلقة كبيرة حبة البركة.
• معلقة صغيرة نشا.
• ربع معلقة ملح 
• ماء حسب الحاجة للعجينة ..

الطريقة:

• بضيف المقادير الجافة مع بعض بوعاء وبخلطهم مع بعض .
• بسكب الزيت الساخن على الخليط وبمعلقة خشب بقلب المزيج حتى يتشرب الطحين كمية الزيت .
• ببدأ اضيف الماء الدافي لحتى تتشكل معي عجينة وبعجنها كتير منيح وضروري تكون العجينة معنا يابسه شوي مو طرية.
• بغطي العجينة وتترك لترتاح نص ساعة .
• تقسم العجينة الى كرات صغيرة وترق بشكل رقيق على سطح مدهون بقليل من الزيت .
• تقلى بزيت ساخن وغزير حتى ياخد اللون الدهبي.
• يقدم بجانب شوربة العدس

بسبوسة اللوتس

المقادير:

• 1/2 كوب معياري لبن زبادي 
• 1 كوب سميد ناعم او خشن 
• 1/2 كوب زيت ذرة 
• 1/2 كوب سكر بني (بامكانك استبداله بالسكر الابيض متل ما انا عملت) 
• 2 حبة بيض. 
• 1معلقة صغيرة فانيلا . 
• 1معلقة صغيرة بيكنج باودر. 
• 2 معلقة كبيرة زبدة اللوتس. 
• معلقة طحينة لدهن القالب. 
• رشة ملح.

للتزيين: 5 ملاعق زبدة اللوتس (استخدمت النوع الكرنشي منها)

الطريقة:

• نخفق المكونات السائلة جيدا بالمضرب اليدوي حتى تختلط 
• نضيف البيض والفانيلا ونخفق 
• نضيف السميد والسكر والبيكنج باودر والملح ونخلط حتى تتجانس المكونات 
• ندهن القالب بالحينة (مقاس 19 انش) ونسكب الخليط 
• تدخل في فرن محمى مسبقا على درجة حرارة 180 مئوية بالرف الوسط وتترك لتنضج مابين (15-20) دقيقة. 
• تترك لتبرد تماما وتخرج من القالب وتزين بكريمة اللوتس بعد تذويبها بالمايكرويف 
• تقطع شرحات من الفراولة فوقها وصحتين ومية هنا

لفائف الصاج المقرمشة

طبق جديد وتغيير عن المألوف ولذيذ جدا

المقادير:

• نص كيلو صدور دجاج منظفة ومقطعه شرائح .
• فلفل رومي ملون مقطع شرائح.
• زيتون أسود مشرح.
• جبنة موزاريلا (حسب المتوفر ضيفي للحشوة).
• بصل مقطع جوانح.
• فطر معلب.
• بهارات(بصل بودرة وثوم بودرة وببريكا حلوةوبهار الدجاج )وطبعا الملح والفلفل الاسود.
• بيض.
• قسماط(قرشلة مطحونه).
• فراشيح الصاج .

الطريقة:

• بتبل الدجاج بالبهارات المذكورة وبتركها ساعه على الأقل لتاخذ النكهة (طبعا أنتي فيكي تتحكمي بالتتبيل على حسب ذوقك).
• بمقلاة على النار بسخنها وبضيف زيت الذرة وبعدين قطع الدجاج بتركها تستوي وبضيف عليها البصل وبخليه لياخد تشويحة 
• بضضيف الفلفل الرومي وبقلب ليدبل شوي وبضيف الفطر واآخر شي قبل ما أطفي النار بضيف الزيتون وتقليبه خفيفة وبطفي النار .
• بترك الحشوة لتبرد تماما .
• بفرد الصاج وبضيف عليها رشة الجبنة وفوقها الحشوة وكمان مرة رشة جبنة وبلفها رول مع مراعاة تسكير الجوانب بدخلها لجوة .
• بخلص كل الكمية وبصحن بخفق البيض مع رشة ملح وفلفل أسود وبصحن تاني بضيف القسماط .
• باخد رول الصاج وبغمسو بالبيض وبعدين بالبقسماط وبضغط عليه كتيرر كويس لحتى يتغلف كل الرول .
• برفعهم بالفريزر مدة 10 دقايق قبل القلي (ضروري هاي الخطوة ).
• بمقلاة فيها زيت غزير بقليهم لحتى ياخدو اللون الذهبي الحلو.
• تقدم بجانب البطاطا المقلية والثوميه.

زيتون بانيه

الزيتون المقلي يعتبر من المقبلات اللذيذة جدا

المقادير:

• علبة زيتون اخضر حبة كامله منزوع النوى
• بيضة
• قسماط
• طحين

الطريقة:

• بصفي الزيتون من المادة الحافظة وبغسلو كتير منيح
• بتركو بالمصفاية لحتى يتصفى
• بصحن فيه الطحين ببدا اضيف كل الزيتون
• في صحن تاني بخفق البيضة مع ملح وفلفل اسود وبضيف حبات الزيتون عليه وبرفعهم على البقسماط
• بمقلاة على النار فيها زيت الذرة بتركها تحمى منيح وبقلي فيها الزيتون بس في خطوة اساسية لازم تنعمل (الزيتون بنحط بالفريزر اقل شي نص ساعه عشان وقت القلي مايفك القسماط منو)

وبقدمو بالصحن وصحتين وعافية

المانتي الأرمني

اليوم بدي آخدكم على بلد جديد وبأكلة جديدة ولذيذة جدا بنصحكم تجربوها 

المقادير:

بالنسبة للعجينة:

• 3 كوب طحين 
• 2 معلقة كبيرة حليب بودرة 
• معلقة صغيرة ملح 
• معلقة صغيرة سكر
• معلقة صغيرة بيكنج باودر (اختياري طبعا لكنه بيعطي هشاشة للعجين لأنه بدون خميرة وسوف يخبز بالفرن حتى لا يصبح يابسا)
• ربع كوب زيت ذرة 
• ماء دافئ للعجن 

بالنسبة للحشوة:

• نصف كيلو لحمة مفروم ناعم 
• بصلة صغيرة مفرومة ناعم (أنا بشرتها )
• رشة بابريكا وفلفل أسود وبهارات لحمة وملح 

بالنسبة للصوص :

• بصلة صغيرة مفرومه ناعم 
• ملعقة صغيرة ثوم مهروس 
• معلقتين صغار صلصة طماطم علبة طماطم معلبة وتطحن لتصبح ناعمه ( انا استعملت طماطم فرش وطحنتها بالخلاط )
• كوب ماء مغلي 
• معلقة صغيرة سكر
• بهارات (ملح وفلفل اسود وبهار تركي و 7بهارات وبهار تركي )
•  لبن زبادي 
• وضرس ثومه مهروس
• ودبس فليفلة 

الطريقة

• بعجن جميع مكونات العجينة وبتركها بمكان دافئ لمدة نصف ساعه 
• بمقلاة عالنار بضيف زيت الذرة وبقلب البصله حتى يدبل وبضيف الثوم والصلصة والبهارات وبنقلب لدقيقة ومن ثم الطماطم المطحونه والماء وتترك لتغلي نصف ساعة على نار هادئة 
• نخلط حشوة اللحمة وتشكل الى كرت صغيرة جدا 
• نفرد العجين ونقطعه بشكل مربعات صغيرة ونضع داخل كل مربع كرة اللحمه ونغلقها من الاطراف لتصبح كالمركب 
• نضعها بصينية الفرن وتخبز بفرن محبى مسبقا 200 درجة مئوية ويشغل من فوق وتحت (اذا ما بيشتغلو سوا بتشغلو من تحت فقط ولمن تستوي اللحمه بتحمرو الوجه قليلا 

للتقديم :

• بنحتاج الي لبن زبادي 
• معلقتين كبار زبدة بنسيحهك عالنار وبضيف الثومه والبهار ودبس الفليفلة (ماكان متوفر عندي استعملت البابريكا الحلوة )
• نضع بصحن التقديم القليل من الصلصة وفوقة المنتي واللبن الزبادي وآخر شي الطشة ويقدم مباشرة وساخن

حلا الخشخش

حلا الخشخش أو متل مابيسموه الناس حلا الهبة لانو انتشر كتير في الفترة السابقة وحبيت أجربو وكان لذيذ بس دسم والي بيعمل دايت لايقرب عليه ;)

المقادير:

• بكيت شعرية باكستانية.
• 2 ظرف كريم كراميل.
• 1 ظرف دريم ويب .
• علبة قشطة.
• 3-4 باكيت بسكوت مالح. 
• نص علبة حليب مكثف ومحلى .
• حليب سائل (لتغميس البسكوت).

الطريقة:

• بالخلاط بنضيف الكريم كراميل والدريم ويب والقشطة ونص علبة الحليب المكثف المحلى وبنخلطهم وبنخليهم على جنب.
• بنكسر الشعرية الباكستانية (حصرا هاي الشعرية مابينفع تستعملي أي نوع تاني) وبنحمسها بمقلاة عالنار لحتى يصير لونها دهبي.
• بنجيب البايركاس أو أي طبق حابة تقدمي فيه (ممكن تعمليها أطباق منفردة) .
• بغمس البسكوت بالحليب وبنصفو طبقة أولى بالبايركس.
• بنضيف الخليط الالي جهزناه مسبقا عليه وبنرش عليه رشة من الشعرية.
• بنكرر الطبقات بنفس الطريقة(طبقة بسكوت وبعدين الخليط ورشة الشعرية) لحتى انتهاء الكمية مع مراعاة انو آخر طبقة هي الشعرية وتكون كثيرة وتزين بصوص التوفي أو السكر الي موجود مع الكريم كراميل.
• تحفظ بالثلاجة لحتى وقت التقديم ويفضل أن تؤكل باااردة أطيب وصحتين ومية عافية.