دجاج مندي مدخن بالجريل

عملتها اليوم بالجريل وكلها على بعضها ما اخدت وقت وبتفك زنقة للمستعجله وأعطت طعم اطيب بكتير من الفرن

وهي وحده من استعمالات الجريل السريعه للي محتاره باستخداماتها

المقادير:

• دجاجه مقطعه ومشرحه متل بالصوره عشان تمتص التتبيله 
• زيت ذره 
• بهارات مندي مدخنه 
• رز بسمتي
• بندوره مقطعه مكعبات 
• بصله مقطعه مكعبات 
• ضرس تومه 
• قرنفل حب 2 
• حب هان 
• ملح وفلفل اسود

الطريقة:

• بتبل الجاج قبل بليله ببهارات المندي المدخنه وعليهم معلقة خل وبتركها بالتلاجه 
• بمقلاة الجريل المغناطسيه بحط قطع الجاج المتبله وعليهم قدر فنجان ميا وبتركها على الواطي لمدة ساعه الا ربع او على حسب استواء الجاجه وبفتحها وبحط زيت الدره وبعلي النار وبحمرها مع التقليب 
• برفع الجاج على جنب وبحط كمان زيت ذره وبقلب بصله مع ضرس تومه لحتى الاصفرار وبضيف عليهم البندوره المفرومه وبقلبهم 
• بضيف عليهم رز بسمتي منقوع والقرنفل والحب هان ومعلقة بهارات المندي وبقلبهم وبسكب الميا عليهم وبتركها على العالي لحتى تصير الميا بمستوى الارز وبسكر المقلايه وبترمها عالهادي لحتى يستوي  
• بقدمه مع الجاج والفستق المقلي ورشة البقدونس 

لذيذ كتير بنصحكم تجربوه

سلطة الكول سلو

نشأت سلطة كول سلو (سلطة الملفوف بالمايونبز) في أواخر القرن التاسع عشر في الولايات المتحدة الاميركية، وقد أُخذ اسمها من اللغة الهولندية (kool sla) اي kool يعني ملفوف وsla يعني سلطة اي سلطة الملفوف، وتقدم كطبق جانبي في الغداء او العشاء ويمكن أكلها باردة .

وتقدم في بعض الدول العربية كطبق بجانب الهمبرغر وغيرها من الاطباق وتعتبر السلطة المناسبة دائما لتقديمها بجانب المشاوي وهي من اسهل واسرع السلطات في العالم، محتوياتها من الملفوف والجزر والمايونيز.

المقادير:

• ملفوف 
• جزر
• مايونيز
• ملح 
• سكر
• خل تفاح 
• لبن 

الطريقة:

• يبشر الملفوف والجزر بشر ناعم.
• يخلط بوعاء 4 ملاعق مايونيز مع ملعقتين لبن وعليهم رشة ملح وملعقة صغيرة سكر وخل.
• يخلط معهم الملفوف والجزر وتوضع في الثلاجة ساعتين على الاقل لان مذاقها يكون اطيب عند أكلها باردة.
• تقدم مع الدجاج المقلي أو المشاوي.

ملاحظة: الكمية تختلف حسب عدد الافراد لذلك انا حددت كمية المايونيز على حسب كميتي فأنتي تستطيعي تقدير الكمية على حسب الخليط المستخدم اعلاه.

كرسبي شيكن

تعبتي وانتي بتجربي وصفات وبالاخر ما بيطلع معك متل برا مقرمش وطري ومستوي

ما الك الا تجربي هالوصفه ومن بعدها ماراح تشتري من برا ابدا وغير هيك بتضمني انك بتاكلي شي نضيف

حاسه بعمل اعلان عالتلفزيون لهالوصفه من كتر ماهي زاكيه وتنبسطي لمن افراد عيلتك بياكلوها وانتي عارفه شو حاطه فيها

نيجي للمهم وهي المقادير:

• طحين (دقيق )
• زنجبيل بودره 
• توم بودره 
• بصل بودره 
• بابريكا 
• شطه 
• واكيد صدور دجاج مخليه مقطعه شرايح (كل صدر بيعطي من 5 الى 6 قطع )
• زيت الدره للقلي 
• ميا 
• مكعب مرق
• نشا

الطريقة:

• في وعاء عميق بنحط الطحين مع البهارات المدكوره وبنرخي الخليط بالميا لحتى نحصل على كثافه خليط الكيك وبنزل في قطع الدجاج وتوضع بالتلاجه ويفضل قبل بيوم او اقل شي 3 ساعات 
• بوعاء تاني بحط فيه الطحين والنشا  وببشر مكعب المرق 
• ببدأ اخد قطع الجاج من الخليط وبحطو بالطحين من غير كبس اهم شي لحتى تتشكل معي التعرجات وفورا بقليها بزيت غميق وحامي اول شي بتكون النار عاليه وبعدين بوطي لحتى يستوي من جوا 
• ممكن ينعمل بقطع الدجاج الي بالعظم 
• يقدم بجانب البطاطا والتوميه وسلطة الكول السلو 

كوزالاك منتي

أكلة نركيه ممكن تقدم كمقبلات او طبق رئيسي ...طيبة كتير بنصحكم تجربوها

المقادير:

• رقائق كلاج 
• لحمة مفرومه 
• بصله
• بندورة 
• لبن زبادي
• تومه 
• ملح وفلفل اسود

الطريقة:

• بنقطع رقائق الكلاج لمثلثات وبنلفها ليصير عنا متل الاصابع وبنقليها او بندخلها الفرن (انا هون استعملت خبز الشراك )
• عالنار بمقلايه فيها زيت دره بندبل بصله مقطعه مكعبات وبنضيف عليها اللحمة المفرومه والبهارات وبس تستوي بضيف عليها حبة بندوره مقطعه صغير وبقلبهم لحتى يتجانس الخليط
• بالنسبة للصوص :بضيف على لبن الزبادي الملح وضرس تومه مفروم ناعم جدا 
• عند التقديم بوزع اول طبقة الاصابع وفوقهم اللبن وبعدين اللحمة المفرومه 
• ولازم تقدم فورا على السفرة لانو اللبن بيطري الكلاج ...وتزين بالبقدونس

رول الدجاج المحشي

المقادير:

• صدور دجاج 
• فلفل رومي ملون 
• جزر
• بهارات ( ببريكا توم بودره بصل بودره ملح فلفل اسود صويا صوص وستشيرصوص )
• تومه مفرومه 

الطريقة:

• بنقطع الصدور الى ستيكات وبدقهم دق خفيف عشان يصيرو رقاق وأقدر ألفهم وبتبلهم بالبهارات المدكوره سابقا لمدة ساعتين على الاقل 
• بقطع الفلفل الرومي الملون شرايح والجزر شرايح وبمقلايه عالنار بحط فيها زيت الدره وزبده وتوم مفروم وبقلب فيها الجزر والفلفل تشويح خفيف 
• بفرد قطع الدجاج وببدا اوزع فيها الحشو وبلفها متل الرول 
• بشويهم بجريل عالنار مع مراعاة وضع الجهة الي انتهى عندها اللف بالاسفل عشان تمسك وما تفتح وبضل اقلب فيهم لحتى يستويو ويتحمرو ويا خدو علامات الشوا الحلوه 
• بقدمهم مع الارز او البطاطا المقليه والسلطات ...جربوها طيبه كتير ونوع من التغيير على السفره