ميني كنافة التوست

المقادير:

• كيس توست 
• اصبع زبده 
• استيكانة زيت ذره 
• معلقتين قطر او (شراب الذرة)

الحشوة:

• كوب ماء
• 2 معلقة طحين 
• 3 ملاعق حليب بودرة 
• 3ملاعق سكر
• علبة قشطه (ممكن الاستغناء عنها )
• نص باكيت دريم ويب 
• بامكانك مضاعفة الكمية

الطريقة:

• بنفرم التوست بعد نزع اطرافه على الفودبروسيسر ليصير ناعم 
• بنضيف عليه الزبدة المذابة والزيت والقطر وبنخلطهم منيح 
• بصينية الكب المتحركه القالب بنرص في كل مربع كمية من الخليط كأنا بنبطن الحواف وبنتركها من نصها مجوفه 
• بنحضر الحشوه :بنسكب جميع المقادير بكسرولا عالنار وبنحركها لحتى تجمد بضيف عليها الدريم ويب وعلبة القشطه (انا ما ضفتها )
• ببدا احط من الحشوه على كل مربع وبسكرها بالتوست الباقي وبكبس عليها 
• بدخلها الفرن على حراره 180 لحتى نشوف الحواف حمرت وبحمرها من فوق 
• بسقيها بالقطر مباشرة (لازم يكون القطر بارد  والكنافة بارده ) 
• بنتركها بالقالب لحتى تبرد وبعد هيك بطلعها بحذر وما بدي اقول غير استمتعو بالطعم اللذيذذذ 
• مقادير القطر: كاستين سكر  كاسه ماء  قطرات ليمون

كريب بالموز والشكولاته

بالشتا لازم ندفي حالنا وما في أحلى من الاكل :)  ....

دفو حالكم بالكريب بحشوة الموز والشكولاته

المقادير :

• 2 بيض
• 2 كوب حليب 
• 1 كوب ونص طحين 
• 1 معلقة صغيره سكر
• 2 معلقة زبده سايحه

الطريقة:

• يخلط البيض مع الحليب والسكر والزبده
• يضاف الطحين ويخلط ليمتزج الخليط تماما 
• توضع بالتلاجه لمدة نص ساعه 
• بمقلاه غير لاصقة ( وهاي الخطوه ضرورية ومهمه كتير عشان ما يلتصق الكريب ) بمسحها بالزيت وبرفعها عالنار لحتى تسخن مظبوط
• بصب مقدار مغرفة من الخليط بالمقلايه وبدورها لحتى تتشكل عنا دائره رقيقة 
• بتركها لحتى احس انها نشفت وتحمرت تحمير خفيف بقلبها عالجهة التانيه 
• بكرر الخطوات السابقة حتى انتهاء الكميه 
• بدهن الكريب بالشكولاته وبضيف عليها قطع الموز وبلفها وبزينها بالصوص

بوريه البطاطا

اكلة خفيفة ظريفة لذيذة

المقادير:

•  5 حبات بطاطا 
• لحمة مفرومه 
• بصله كبيره 
• بهارات 
• ملح وفلفل اسود
• زبدة 
• قسماط (قرشلة)

الطريقة:

• بقشر حبات البطاطا وبقطعها مكعبات وبسلقها بميا وملح 
• بمقلاية عالنار بضيف البصله المقطعه مكعبات وبدبلها وبضيف عليها اللحمة النفرومه وبتبلها بالبهارات وبتركها لحد ماتستوي 
• بصفي البطاطا من الميا وبهرسها وممنوع استعمال الفود بروسيسر لانه حتعطي نتيجه سيئة جدا وبضيف عليها زبدة والملح والفلفل الاسود ورشة تومه بودره وبخلطها 
• بالبايركس بفرد فيه نص كمية البطاطا وفوقها بضيف اللحمة المعصجة وبفردها 
• ببدأ بفرد النص التاني من البطاطا على اللحمة  ووبرش على جهها القسماط وقطع صغيرة من الزبدة 
• بدخلها الفرن من تحت مدة ربع ساعه وبعدين بحمر وجهها 
• يفضل تقطيعها بعد ربع ساعه عشان تبرد وتمسك القطعة

المسخن

المُسخّن أو المحمّر هو طبق فلسطيني من الدجاج المشوي المطبوخ مع البصل والسمّاق والزعفران مع حبوب الصنوبر واللوز مقدمةً على خبز الطابون، جاءت هذه المكونات من البيئة الفلاحية في فلسطين، المسخن أكلة تراثية ومن أشهر الأكلات التي تشتهر بها مدينتي جنين وطولكرم، كما انتشر هذا الطبق في الأردن لاحقاً وأصبح من وجبات المطبخ الأردني، ويقدم المسخن أحياناً بطريقة تشبه إلى حد ما الشطائر أو الساندويشات أو اللفائف.

كل مرة بعمل المسخن بسلق الدجاج لحاله، والمرة هاي خليتو يستوي مع البصل وجد النكهة بتفرق وتشرَّب الدجاج طعم البصل والسماق وطلع طري ودايب

المقادير:

• دجاج حسب العدد 
• بصل مقطع مكعبات 
• سماق مطحون 
• خبز الطابون 
• زيت الزيتون 
• ملح وفلفل اسود 
• بهارات لتتبيل الدجاج 
• حب هان 
• فستق مقلي أو لوز وبقدونس للتزيين 

الطريقة:

• توضع طنجرة على النار ويسكب زيت الزيتون وعليهم البصل المقطع والدجاج وحبتين هيل مطحون لتخفيف حدة الزفره وتقلب المكونات مع بعض وتترك على نار هادئة لمدة نصف ساعة او لحتى ينضج الدجاج.
• نضيف السماق والملح والفلفل الاسود ويتم عصر قليل من الليمون عليهم لزيادة الحموضة اذا كان السماق غير حامض.
• برفع الدجاج ويتبل بالتوابل ويحمر بالفرن.
• يوضع خبز الطابون ويغطس بالطنجرة ليمتص من زيت الزيتون ويرفع على صينية ويوضع عليه البصل ثم يدخل الفرن ليتحمر قليلاً ثم يرش عليه الفستق او اللوز المحمر.
• تكرر نفس الخطوات بكل رغيف حتى الانتهاء من كل الكمية.
• عند التقديم توضع كل الارغفة على صحن فوق بعض والدجاج عليهم ويرش بقدونس ولوز او فستق مقلي 
• اكله فلسطينية معتبرة ويقدم بجانبها لبن بخيار وشوربة فريكة.

كيكة الجزر

كيكة الجزر والجوز من الكيكات اللذيذة جدااا

المقادير:

• 2 كوب سكر
• 3 بيض
• 3/4 كوب حليب سائل 
• 3/4 كوب زيت ذرة
• كوب جوز هند
• 2 كوب طحين منخول
• كوب عين جمل 
• 2 كوب جزر مبشور
• معلقة كبيرة بيكنج باودر
• 2 معلقة صغيرة بيكربونات الصوديوم 
• معلقة كبيرة خل ابيض
• فانيلا 
• معلقة كبيره قرفه او على حسب الرغبه

الطريقة:

• سخني الفرن على درجة حراره 180
• ادهني الصينية بالسمنة وغلفيها جيدا بالطحين وضعيها جانبا 
• اخلطي السكر والحليب والزيت والبيض والخل مع الفانيلا
• ضيفي للخليط الجزر وجوز الهند وقلبيهم جيدا 
• في وعاء اخر اخلطي الطحين والقرفه والكربونه والبيكنج باودر 
• ضيفي المواد الجافه للسائله بالتدريج مع الخفق حتى يمتزج الخليط 
• اسكبي نص الخليط بالصينية المدهونه وضيفي عليهم عين الجمل والزبيب واسكبي فوقه الخليط المتبقي 
• ضعيها بالفرن لمده 55 دقيقه 

تزين بالجزرية :

• 2 كوب جزر مبشور
• 5 ملاعق كبيره سكر
• نص كوب ماء
• 2 معلقة كبيره ليمون 
•  توضع جميع المقاير مع بعض بكسروله عالنار لنص ساعه او لبين ما تتبخر الميا كلها ويتقل وبنتركها لتبرد وبنزين فيها الكيك

أرز بالحليب وكريم الكراميل

الأرز بالحليب أو الأرز باللبن هو نوع من الحلوى، يصنع من الأرز، والحليب، والسكر، ويوضع عليه الزبيب وبعض المكسرات او القرفة والمصريين يفضلون وضع القرفة لأنها تعطى مذاقاً جيداً، وهو من أنواع الحلوى الشهيرة في بعض الدول العربية، وتختلف تسميته حسب البلد ففي سوريا ولبنان والأردن يسمى أرز بالحليب وفي فلسطين يسمى بحتة، وفي مصر والسودان يسمي أرز باللبن وفي تونس محلبية ويسمى في الشام رز بحليب، فهو من أشهر الحلويات المنزلية الشامية.

الرز بالحليب تحلاية خفيفة وظريفة حبيت اقدمها اليوم بإضافة نكهة تانية غير المتعودين عليها، وإليكم طريقة إعدادها:

المقادير:

• أرز مصري
• حليب
• سكر
• 1 باكيت كريم كراميل

الطريقة:

• نقوم بسكب كوب من الارز في طنجرة على النار ونضع عليهم 4 أكواب حليب ونتركهم على نار هادئه مع التقليب كل فترة لكي لا يحترقوا  ويلتسق الخليط بالقاع، الى ان ينسلق الارز وينضج
• عندما ينضج الارز نضيف عليهم السكر وباكيت الكريم كراميل ونحركهم ونقوم بإعادة غليه على النار الى ان يصبح المزيج سميك (لا نقوم بإضافة النشا بتاتا والاعتماد على نشا  الارز المسلوق بالحليب)
• نسكب الخليط بصحون التقديم ونتركهم الى ان يبردو تماما وندخلهم الثلاجة ونزينهم بالتوفي او الصوص الكراميل عند التقديم
• ملاحظه: ممكن اضافة نصف كوب كريمة على الارز بعد نضوجه  ليعطي طعم رائع وصحتين وهنا

الفاهيتا

الوصفة كتير سهلة وسريعه وما بتاخد وقت

المقادير:

• صدور دجاج مقطعه شرايح
• فلفل رومي ملون مقطع شرايح طوليه 
• بصل مقطع جوانح
• جبنة شيدر
• بهارات الفاهيتا
• خبز التورتيلا
• كزبرة ناشفة

الطريقة:

• بنقلب الدجاج بمقلايه عالنار مع زيت الذرة لحد ما يستوي
• بضيف عليه البصل وبقلبو وبعدين الفلفل الرومي وبحركهم لحد ما يطرو شوي 
• بتبل بالملح والفلفل الاسود وبهارات الفاهيتا ممكن الاستعاضة عنها بالتوابل (التوم البودره والبصل البودره ورشة كمون وبهار وببريكا )
• بفرد خبز التورتيلا (انا استعملت خبز الصاج ) وبحط فيه خليط الفاهيتا وبرش الجبنه وبلف الخبز وبكبسها عالتوستر لتتحمر 
• تقدم بجانبها البطاطا

ملاحظة:

ممكن ينعمل خبز التورتيلا بالبيت وانا نزلت قبل هيك طريقة عملو للي بتحب بتلاقي وصفتو في الشاورما