معكرونه بالكريمه والجاج

طبخة الكسلانين هيك بسميها سهله ومقاديرها متوفره وما بتاخد وقت وطيبه كتيررر

المقادير:

• صدور جاج مقطعه شرايح 
• معكرونه اسباغيتي
• علبه قشطه (ممكن استبدالها بالكريمه )
• علبة فطر 
• بصله مقطعه ناعم 
• تومه مهروسه ناعم 
• كوب حليب 
• معلقه طحين 
• زبده 
• جبنة موزاريلا

الطريقة:

• بنسلق المعكرونه وبصفيها وبخليها على جنب
• بطنجره عالنار بدوب الزبده وبقلب فيها البصل والتومه لحد ما يدبلو وبضيف عليهم صدور الدجاج المتبلين بالملح والفلفل الاسود ولحد ما يستويو وبعدين علبه الفطر المغسوله وبقلب 
• بضيف معلقة طحين وبحرك الخليط وبسكب عليهم علبة القشطه المخففه بالحليب وبتركهم 5 دقايق يغلو ويتسبكو (انتي بتتحكمي بكثافة الكريمه بزياده او تقليل كميه الحليب )
• بضيف المعكرونه عليهم وبقلب لحد ما يختلط الخليط 
• تقدم ساخنه مع رشة الجينه على الوجه

الدجاج المقرمش مع التوميه والكولسلو

رهيب رهيب ..نعم لمقاطعته من الخارج ويس لعمايله في البيت ..والقرمشه سمعوها الجيران والطعم دماااار

طولت عليكم حبيت أعمللكم جو دعايه عشان تتشجعو لتعملوه بالبيت وبهيك تضمنو نضافتو مشان صحة ضغاركم الحلوين

المقادير:

• جاجه حجم صغير ومقطعه لثمانية قطع (ان كانت اكبر قطعو القطع اكتر)
• التوابل(بابريكا توم بودره وبصل بودره وملح وفلفل شطه جنزبيل بودره توابل الدجاج )
• طحين 
• ماء 
• نشا 

للتوميه :

• لكل كوب حليب سائل كوبين زيت نباتي 
• ضرس تومه مفروم 
• ملح 
• عصرة ليمونة

للكولسلو :

• ملفوف مبشور ناعم 
• جزر مبشور ناعم  
• خل معلقة صغيره 
• سكر معلقه صغيره 
• مايونيز 
• لبن شمينت معلقتين صغار 
• رشة ملح

الطريقة:

• بعد ما نغسل الدجاج ونضفو بنقطعو لتمانيه قطع 
• بصحن بنخلط الطحين مع التوابل المذكوره وبنسكب الميا وبنحرك لحتى تصير كثافتو قريبه من خليط الكيك 
• بنغطس الجاج فيه وبنتركو أقل شي ساعتين ويفضل قبل يوم 
• بصحن تاني بنحط طحين كمان مره وعليهم معلقتين كبار نشا وملح وفلفل حار بودره 
• بنرفع قطعه من الجاج من الخليط وبنلكو بالطحين (طبطبه) من غير ضغط لحتى تتشكل عنا تعرجات 
• بنقليهم فورا في الزيت الغزير والحامي اول دقيقتين وبعدين بنوطي النار وبنتركو ليستوي ويتحمر 
• بنرفعو على شبك ليتصفى من الزيت 

التوميه :

• بالخلاط بنضيف الحليب والتومه وبنشغل وبنبدا نسكب خيط رفيع من الزيت لحتى يجمد الخليط وبنضيف عصره الليمونه والملح وبابريكا اذا بتحبي 
• ملاحظه لضمان نجاح التوميه :ممكن ياخد اقل من كمية الزيت المذكوره وممكن اكتر حسب انتي قديش بتحبي كثافتو 
• ما توقفي الخلاط ابدا الا لمن تحصلي عالنتيجه المرجوه 
• اسكبي الزيت بخيط رفيع شوي شوي

الكولسلو :

• بنخلط المايونيز مع الخل والسكر واللبن وبنضيف الملفوف والجزر ويترك بالتلاجه قبل ساعتين من موعد تقديمه

التبولة

أصل التسمية:  اسم هذه السلطة جاء من مصدر كلمة توابل، ومن فعل تبّل الشيء، وهو على الأرجح اسم عربي اكتسبته هذه السلطة بسبب إضافة توابل مختلفة عليها وخلط مكوّناتها الناعمة.

والتبولة هي قصة تلك السلطة الشهية المصنوعة من الفرم الناعم لمختلف مكوّناتها: البقدونس والطماطم والنعناع والبصل والخسّ ودبس الرمان وعصير الليمون والبرغل. ويُعتقَد أنّ قدماء اللبنانيين هم من أضافو البرغل إلى الوصفة الأصلية التي وصلتهم بعد أن قطع هذا الطبق ما يعادل الألف كيلومتر انطلاقاً من بلاد ما بين النهرين، حيث اخترعه الكلدانيون العام 1800 قبل الميلاد، بحسب مخطوطات أكادية، ثم سافر عبر التاريخ والجغرافيا نحو بلاد الفنيقيين واستقرّ قرب شواطيء البحر الأبيض المتوسط.

وقد ذهبت بعض المراجع إلى القول أنّ التبّولة تعرّضت إلى تطوّرات كبيرة، خصوصا في منطقة سهل البقاع، شمال بيروت، حيث طوّر اللبنانيون أنواعا منها، وهي التبّولة الكذّابة والتبّولة باللحم.

ويبدو أنّ هذا الطبق المسافر لم يقف عند هذا الحدّ، فبعد أن استوطن لبنان وصار جزءا من مطبخه التقليدي، شدّ الرحال مجدّدا وقطع قرابة نصف الكرة الأرضية ليستقرّ في أميركا اللاتينية، إذ نجد أنّ هذه السلطة موجودة في البرازيل، وفي بعض البلدان التي هاجر إليها اللبنانيون، وعرفت وجودا مكثّفا لهم على أراضيها. خصوصا أنّهم يشكّلون ثمانية في المئة تقريبا من سكّان البرازيل، الذين يسمونّها تِبيلي.

جدير بالذكّر أنّ هذا الطبق قد شكّل مؤخّرا نزاعا عربيا إسرائيليا، بعدما حاول الإسرائيليون نسبته إليهم وترويجه في العالم على أنّه طبق تراثي يهودي، لكنّ المخطوطات التاريخية التي قدّموها كانت حديثة جدا مقارنة بالمخطوطات التي تؤكّد اختراعه ووجوده أولّا في العراق ثم لبنان الذي حاول أن يدخل موسوعة غينيس بأكبر طبق تبّولة في العالم.

كما يحتفل اللبنانيون كلّ سنة باليوم الوطني للتبّولة في السبت الأوّل من شهر يوليو/تموز، منذ العام 2001، وذلك كمبادرة لحفظ هذا التراث المطبخي، إذ يشكّل جزءا من التقاليد اللبنانية والعربية وشاهداً على التبادل الحضاري بين العرب، وعلى بعض الصراعات التاريخية التي يخوضونها للحفاظ على هويّتهم.

التبولة من السلطات التي ترافق كل السُفر وخاصة مع الكبة والمعجنات ولا يمل منها وبذات الوقت مغذية ومفيدة، إليكم طريقة إعدادها:

المقادير:

• بقدونس 
• نعنع 
• بندورة (طماطم)
• بصل 
• برغل ناعم 
• زيت زيتون 
• ملح 
• ليمون

الطريقة:

• تفرم الخضار (البقونس والنعنع والبندوره والبصل ) فرم ناعم والكمية على حسب عدد افراد الاسرة
• ينقع البرغل الناعم بعصير ليمونة كاملة (وهذا سر يجعل التبولة ناشفة وما تزل ميا) بدل ماننقعو بالميا لحتى البرغل يطرى 
• في صحن التقديم نضيف الخضار والبرغل والملح وزيت الزيتون وبنقلبهم وصحة وعافية

شيكن بباروتشي

يسعد صباحكم 

وصفتي اليوم لمن تجربوها حتاخدكم لعالم تاني من اللذاذه جربوها حتعجبكم وحتكرروها كتير 

المقادير:

• صدور دجاج مقطعه ستيكات ومدقوقه لتخفيف سماكتها
• فلفل رومي ملون مقطع ناعم جدا (استعملت الاخضر والاحمر)
• بصله مقطعه ناعم جدا
• علبة كريمه
• معلقه صغيره صلصة طماطم 
• علبة زبادي 
• قسماط (قرشله )
• زبدة
• بهارات  (اوريغانو ملح فلفل اسود)

الطريقة:

• بنتبل قطع الدجاج بالاوريغانو والملح والفلفل الاسود 
• بنضيف عليهم علبه الزبادي وبنتركهم بالخلطه اقل شي ساعتين لتتشرب كل النكهات وتطرى 
• بنزيل اي لبن زياده من قطع الدجاج وبنغطسهم بالبقسماط من الجهتين 
• بنرفعهم بالتلاجه مده نص ساعه وبعدها بنقليهم بالمقلايه بزيت متوسط ما يغطيهم لحد ما تستوي ويتحمرو 
• بمقلايه تانيه بندوب معلقتين زبده وبنقلب فيها البصله وبعدين الفلفل الرومي لحد ما يدبلو شوي 
• بنضيف عليهم معلقة الصلصه والملح والكريمه وبنغليها غلوة وبنرفعها عن النار
• عند التقديم بنسكب على كل قطعه دجاج معلقة كبيره من الصوص بنغطيها فيه وبنقدمها بجانب الرز الابيض
• بالهنا والعافية