فتة الدجاج

يسعد صباحكم ...جربت مبارح طريقة مختلفه للفته عن الي متعودين نعملها بفلسطين (اذا حابين تشوفو وصفتها بتلاقوها منزلتها قبل هالمره ) وبتختلف اختلاف كلي عنها

المقادير:

• جاجه مسلوقه ومنسله من العظم(استعملت انا صدور مسحبه )
• خبز لبناني مقطع مكعبات ومقلي
• مرقة دجاج
• رز مفلفل بالطريقه العاديه 
• طحينة 
• لبن زبادي 
• ليمون 
• توم مهروس
• معلقة زبده 
• ببريكا
• فستق وبقدونس للزينه 

الطريقة:

• بصحن التقديم بفرد فيه الخبز المقلي طبقه اولى وبشربو تشريب خفيف بمرقة الدجاج 
• بضيف عليه معلقتين من صوص اللبن ..لتحضيره (بوعاء بخلط اللبن مع معلقتين كبار طحينه وتوم مهروس حسب الرغبه والملح وعصير الليمون طبعا بتعدلي النكهه حسب الذوق )
• تاني طبقه بفرد الرز 
• بضيف قطع الدجاج كطبقة تالته 
• اخر شي بسكب صوص اللبن كلو على الرز 
• بزين بالفستق المقلي وبمقلايه عالنار بدوب فيها معلقة الزبده وعليها نص معلقه صغيره ببريكا وبسكبها على الفته اخر شي 
• جربوها طييييبه للي متعود على فتتنا الغزاويه 

ملاحظه :الخطوات هاي لازم تنعمل قبل التقديم مباشره عشان الخبز ما يبوش ويطرى

دجاج بالمشروم والكريمة

المقادير:

• صدور دجاج
• علبة مشروم ولو متوفر الطازه افضل
• بصل مقطع شرايح
• علبة كريمه طهي
• ملح وفلفل اسود
• بهارات

الطريقة:

• بقطع الصدور لشرايح رقيقة وبتبلها بالملح والفلفل الاسود  والبابريكا
• بحمي الجريل عالنار وبضيف زيت الذره وبقلب شرائح الجاج عليهم لحد الاستواء
• برفعهم من النار وبضيف البصله وبقلبها لحد ما تدبل وبعدين المشروم (الفطر) وبخليه ياخد تشويحه خفيفه
• بدير عليهم علبة الكريمه وبرجع بضيف الجاج وبتركهم ياخدو غلوه لحد ما تثقل الكريمه (ممكن تضيفو معلقة طحين عشان يتقل الصوص اكتر لو بتحبو)
• يقدم بجانب الارز ...جربوها كتيرررر لذيذه وسهلة

سمك مشوي

المقادير:

• بقدونس مفروم 
• ثوم مفروم ناعم
• ليمون 
• بهار سمك 
• ملح 
• كمون 
• زيت ذره 
• فلفل اخضر مفروم ناعم

الطريقة :

• بعد تنظيف السمكه بتبلها بالتومه وببهار السمك والكمون والملح والليمون وبتركها اقل شي ساعتين 
• بخلط البقدونس مع التومه والفلفل الاخضر الحار وبحشيها ببطن السمكه وبعمل شق من الجنبين وبحشي فيهم شوي من الحشوه 
• اليوم انا شويتها بمقلاة الجريل ما اخدت وقت وطلعت دايبه وطريه ..حطيت عليها شوية زيت ومعلقتين ميا وسكرت المقلايه وتركتها على نار هاديه  
• بعد مرور ربع ساعه بفتح عليها اذا استوت بقلبها وبعلي النار عليها لتتحمر السمكه من الجهتين 
• قدمت معها رز الصياديه الاحمر (نزلت وصفتو من قبل ) وصوص الطحينه بالبقدونس

عجينة العشر دقايق

شكل العجينة بعد خلط  النص الاول من المقدار (سائلة)

بعد التخمير 

وانا بعجن اتذكرتكم وصورت الصورتين عالسريع وقلت لازم أعطيكم طريقة هالعجينة الطريه وحتى لتاني يوم ولايمكن اغيرها بعمل فيها كل معجناتي وبسميها العجينة السحريه لانها سهله وما بتستني بالساعه لحتى تخمر وخصوصا لو كان الجو بارد 

المقادير:

• 5 كوب طحين (دقيق) بقسمهم لمقدارين بالمرحلة الاولى 2 كوب والمرحله التانيه 3 كوب 
• 2 كوب ماء دافئ
• 2 معلقة كبيره خميره 
• معلقة كبيره سكر
• معلقة صغيره ملح 
• نص كوب زيت ذرة 
• 2 معلقة حليب بودره 

الطريقة :

• طريقة عجنها بتتقسم لمرحلتين :
• اول شي بضيف كوبين الماء الدافي على كوبين طحين ومعلقتين الخميره والسكر والملح وبحركهم بالمعلقة وبتصير عنا العجينة سائله 
• بتركها لمده عشر دقايق على جنب 
• بلاحظ انو تشكل فقاعات على سطح العجينه بعد العشر دقايق بضيف عليهم المقدار التاني والمتبقي من الطحين (3 كوب طحين ) والزيت والحليب البودره وببدأ اعجن لحتى تتشكل عندي عجينة ملساء وببدأ اشتغل فيها 
• ملاحظة : بفترات الشتا بعجن عجينتي وبتركها ترتاح لوقت تحضير حشوتي هيك بحسها بتعطيني نتيجه افضل 

ميني كنافة التوست

المقادير:

• كيس توست 
• اصبع زبده 
• استيكانة زيت ذره 
• معلقتين قطر او (شراب الذرة)

الحشوة:

• كوب ماء
• 2 معلقة طحين 
• 3 ملاعق حليب بودرة 
• 3ملاعق سكر
• علبة قشطه (ممكن الاستغناء عنها )
• نص باكيت دريم ويب 
• بامكانك مضاعفة الكمية

الطريقة:

• بنفرم التوست بعد نزع اطرافه على الفودبروسيسر ليصير ناعم 
• بنضيف عليه الزبدة المذابة والزيت والقطر وبنخلطهم منيح 
• بصينية الكب المتحركه القالب بنرص في كل مربع كمية من الخليط كأنا بنبطن الحواف وبنتركها من نصها مجوفه 
• بنحضر الحشوه :بنسكب جميع المقادير بكسرولا عالنار وبنحركها لحتى تجمد بضيف عليها الدريم ويب وعلبة القشطه (انا ما ضفتها )
• ببدا احط من الحشوه على كل مربع وبسكرها بالتوست الباقي وبكبس عليها 
• بدخلها الفرن على حراره 180 لحتى نشوف الحواف حمرت وبحمرها من فوق 
• بسقيها بالقطر مباشرة (لازم يكون القطر بارد  والكنافة بارده ) 
• بنتركها بالقالب لحتى تبرد وبعد هيك بطلعها بحذر وما بدي اقول غير استمتعو بالطعم اللذيذذذ 
• مقادير القطر: كاستين سكر  كاسه ماء  قطرات ليمون

كريب بالموز والشكولاته

بالشتا لازم ندفي حالنا وما في أحلى من الاكل :)  ....

دفو حالكم بالكريب بحشوة الموز والشكولاته

المقادير :

• 2 بيض
• 2 كوب حليب 
• 1 كوب ونص طحين 
• 1 معلقة صغيره سكر
• 2 معلقة زبده سايحه

الطريقة:

• يخلط البيض مع الحليب والسكر والزبده
• يضاف الطحين ويخلط ليمتزج الخليط تماما 
• توضع بالتلاجه لمدة نص ساعه 
• بمقلاه غير لاصقة ( وهاي الخطوه ضرورية ومهمه كتير عشان ما يلتصق الكريب ) بمسحها بالزيت وبرفعها عالنار لحتى تسخن مظبوط
• بصب مقدار مغرفة من الخليط بالمقلايه وبدورها لحتى تتشكل عنا دائره رقيقة 
• بتركها لحتى احس انها نشفت وتحمرت تحمير خفيف بقلبها عالجهة التانيه 
• بكرر الخطوات السابقة حتى انتهاء الكميه 
• بدهن الكريب بالشكولاته وبضيف عليها قطع الموز وبلفها وبزينها بالصوص

بوريه البطاطا

اكلة خفيفة ظريفة لذيذة

المقادير:

•  5 حبات بطاطا 
• لحمة مفرومه 
• بصله كبيره 
• بهارات 
• ملح وفلفل اسود
• زبدة 
• قسماط (قرشلة)

الطريقة:

• بقشر حبات البطاطا وبقطعها مكعبات وبسلقها بميا وملح 
• بمقلاية عالنار بضيف البصله المقطعه مكعبات وبدبلها وبضيف عليها اللحمة النفرومه وبتبلها بالبهارات وبتركها لحد ماتستوي 
• بصفي البطاطا من الميا وبهرسها وممنوع استعمال الفود بروسيسر لانه حتعطي نتيجه سيئة جدا وبضيف عليها زبدة والملح والفلفل الاسود ورشة تومه بودره وبخلطها 
• بالبايركس بفرد فيه نص كمية البطاطا وفوقها بضيف اللحمة المعصجة وبفردها 
• ببدأ بفرد النص التاني من البطاطا على اللحمة  ووبرش على جهها القسماط وقطع صغيرة من الزبدة 
• بدخلها الفرن من تحت مدة ربع ساعه وبعدين بحمر وجهها 
• يفضل تقطيعها بعد ربع ساعه عشان تبرد وتمسك القطعة

المسخن

المُسخّن أو المحمّر هو طبق فلسطيني من الدجاج المشوي المطبوخ مع البصل والسمّاق والزعفران مع حبوب الصنوبر واللوز مقدمةً على خبز الطابون، جاءت هذه المكونات من البيئة الفلاحية في فلسطين، المسخن أكلة تراثية ومن أشهر الأكلات التي تشتهر بها مدينتي جنين وطولكرم، كما انتشر هذا الطبق في الأردن لاحقاً وأصبح من وجبات المطبخ الأردني، ويقدم المسخن أحياناً بطريقة تشبه إلى حد ما الشطائر أو الساندويشات أو اللفائف.

كل مرة بعمل المسخن بسلق الدجاج لحاله، والمرة هاي خليتو يستوي مع البصل وجد النكهة بتفرق وتشرَّب الدجاج طعم البصل والسماق وطلع طري ودايب

المقادير:

• دجاج حسب العدد 
• بصل مقطع مكعبات 
• سماق مطحون 
• خبز الطابون 
• زيت الزيتون 
• ملح وفلفل اسود 
• بهارات لتتبيل الدجاج 
• حب هان 
• فستق مقلي أو لوز وبقدونس للتزيين 

الطريقة:

• توضع طنجرة على النار ويسكب زيت الزيتون وعليهم البصل المقطع والدجاج وحبتين هيل مطحون لتخفيف حدة الزفره وتقلب المكونات مع بعض وتترك على نار هادئة لمدة نصف ساعة او لحتى ينضج الدجاج.
• نضيف السماق والملح والفلفل الاسود ويتم عصر قليل من الليمون عليهم لزيادة الحموضة اذا كان السماق غير حامض.
• برفع الدجاج ويتبل بالتوابل ويحمر بالفرن.
• يوضع خبز الطابون ويغطس بالطنجرة ليمتص من زيت الزيتون ويرفع على صينية ويوضع عليه البصل ثم يدخل الفرن ليتحمر قليلاً ثم يرش عليه الفستق او اللوز المحمر.
• تكرر نفس الخطوات بكل رغيف حتى الانتهاء من كل الكمية.
• عند التقديم توضع كل الارغفة على صحن فوق بعض والدجاج عليهم ويرش بقدونس ولوز او فستق مقلي 
• اكله فلسطينية معتبرة ويقدم بجانبها لبن بخيار وشوربة فريكة.