كرسبي الدجاج

كرسبي الدجاج معشوق الصغار

ماتفوتي وصفتو واجربي اعمليه بالبيت أكيد بتضمني نظافتو وبتطمني على أولادك شو بياكلو

المقادير:

• نص كيلو صدور دجاج مقطعين الى شرائح عريضة 
• بهارات لتتبيل الدجاج(بصل بودرة /ثوم بودرة/ببريكا/زنجبيل بودرة /بهارات دجاج/ملح / فلفل أسود)
• دقيق
• بيضة
• نشا 
• بيكنج باودر 
• مكعب ماجي 
• خس مقطع 
• كاتشب ومايونيز

الطريقة:

• بنتبل قطع الصدور بالبهارات وتترك لمدة ساعتين عالأقل
• بضيف عليهم البيضه وبخلط 
• بوعاء بضيف النشاء والدقيق والبيكنج باودر ومكعب الماجي المبشوروبحب أضيف كمان البصل البودرة والتوم البودرة  وبقلبهم مع بعض  
• عالنار بحمي مقلاية بزيت غزير أهم شئ 
• ببدأ أغمس قطع الصدور بخليط الدقيق من غير الضغط عليه لحتى أحصل على التعرجات والقرمشه 
• وبقليهم على دفعات واذا حسيتي انو النار حاميه كتير خفضيها وقت القلي 
• بصفيهم على شبك حديد لحتى يضل مقرمش ومايرطب 
• ببدأ أحشيهم  بالخبز مع اضافة الخس والكاتشب والمايونيز أو على حس بالرغبه وفيكي تتفنني بالصوص 
• يقدم بجانب البطاطا المقلية 

وصحة ومية هنا جربوها كتير طيبة ومقرمشة

لولي بوب الكيك

مين فيكم مابضل عندها كيك وبتضلها تحتار شو تعمل فيه ؟!!

جبتلكم وصفة لاعادة تدوير بقايا الكيك وسهلة بنفس الوقت وانا بأأأكدلك انو راح يخلصو بعد هالوصفة

المقادير:

• كيك 
• قشطة 
• شكولاتة خام 
• فارمسي للتزيين 
• أعواد خشب 

الطريقة:

• بنفتت الكيك عالفود بروسيسر او بالشوكة .
• بنضيف عليه قشطة بالتدريج واعجنيه لحتى يتكون معك عجينة بتقدري تشكليها (مابقدر ألزم بمقدار معين لانو ممكن كمية الكيك الي عندك تختلف فبتحتاجي مقدار مختلف للقشطة)
• بكور العجين لكور وبضعها على صحن .
• بحمام مائي بسيح الشكولاته أو (بالمايكرويف بس انتبهى تنحرق وتفصل معك ) 
• بغمس راس  عود الخشب بالشكولاته وانتبهو ضروري هاي الخطوة لحتى ماتقع الكورة منه
• وبغرس كرة الكيك على العمود وببدأ أغمسه بالشكولاته مع مراعاة انو اتخلص من الزيادة 
• وبزينها بالفارمسي وبتركها لحتى تجف 
• وصحتين ومية عافيه راح يحبها الكبار قبل الصغار  

كوكتيل الأفكادو

اجى الصيف وصار وقت حاجه باردة ترطب علينا ...جربو عصير الأفكادو

المقادير:

• حبة أفكادو 
• معلقة قشطة 
• حليب سائل بارد
• عسل حسب الرغبة بحلاوة العصير
• كاجو وفستق حلبي للتزيين 

الطريقة:

• بالخلاط بضيف الافكادو بعد تقشيرو وتقطيعه مكعبات 
• وبضيف الحليب والعسل وبخلط لحتى يصر عنا عصير 
• بصب الخليط بكاسة وبزينو بمعلقة القشطة والفستق الحلبي والكاجو وشوية عسل 
• واشربو واستمتعو بمشروب بمدكم بالطاقة والفوائد

سلطة السيزر

سلطة السيزر من أنواع السلط المفضلة بالنسبة الي وبحب أطلبها دايما بالمطاعم بس لمن جربت أعملها طلعت ألذ من شغلهم

المقادير:

• خس مفروم خشن
• صدر دجاج 
• خبز توست 
• جبنة بارميزان (استعضت عنها بنوع تاني متوفر عندي)
• ثوم 

للصوص: 

• مايونيز 
• ماستردة(خردل)
• زيت زيتون 
• لبن شمينت (سور كريم )
• ملح وفلفل أسود
• رشة سكر لتوازن الطعم 

الطريقة:

• بتبل صدر الدجاج بالبصل والتوم البودرة والملح والفلفل الاسود وبشويه على الجريل 
• بقطع التوست الى مكعبات وبضيف عليه زيت الزيتون والثوم المدقوق والأوريغانووبدخله الفرن لحتى يحمر ويقرمش
• لخلط جميع مكونات الصوص مع بعض 
• بصحن التقديم بضيف الخس وفوقه الجاج ومكعبات التوست وعلى الوجه الصوص والجبنة المبشوره 

تخزين ورق العنب

بما أنو هلأ نزل ورق العنب فلازم استغل واخزنو عشان ألاقيه وقت ما يخلص الموسم.

اعتمدت من السنه الماضية تخزينو بالمي والملح ولقيت النتيجة ممتازه خصوصا انو التفريز مو مساعد عشان الكهربا 

يلا على الطريقة لتتشوفوها وتجربوها

بحتاج الى:

• كل لتر مي بيحتاج 7 ملاعق كبيرة ملح 
• معلقتين كبار سكر 
• معلقة كبيرة خل

بضيف كل المقادير مع بعض وبخلطهم لحتى يدوب الملح.

بغسل الورق عنب وبتركو يتصفى شوبي من الميا.

بلف كل 10 ورقات تقريبا مع بعض وبصفطها داخل مرتبان لحتى يتعبى ب.

بضيف المي والملح الي عملناه عليه مع غمر الورق لفوق تقريبا بمقدار اصبع وبضيف على الوجه زيت زيتون لحتى يمنع التعفن.

بسكر المرطبان كتييير كويس لحتى ما يتعفن وهيك بكون جاهز عندك وبضل عندك لسنة.

وعند الاستعمال بغسل الورق وبسلقو على الخفيف وببدأ استعملو عادي.

كرات البطاطا بالجبنة

المقادير:

• 2 حبة بطاطا حجم كبير 
• بقسماط (قرشلة مطحونه وتسمى ايضا كعك مطحون )
• ملح وفلفل اسود 
• معلقة كبيره زبدة 
• جبنة موزاريلا او قشقوان او شيدر للحشوة 
• بيضة 
• طحين

الطريقة:

• بسلق البطاطا بعد تقشيرها وتقطيعها لحد الاستواء تماما 
• بهرس البطاطا وهي سخنة وبضيف عليها الزبدة وبتبلها بالملح والفلفل الاسود 
• نأخد كمية منها وبكورها وبضيف بوسطها الجبنة وببدا أسكرها كتير منيح عشان الجبنة ماتطلع منها أثناء القلي وبشكلها على شكل كور

للتغليف: 

• بجيب صحن للطحين وصحن للبقسماط وصحن للبيض بخفقها وبضيف عليها الملح وفلفل اسود 
• ببدا أغلف كور البطاطا بالطحين وبعدين بالبيض ومن ثم بالبقسماط  المخلوط بالسمسم الابيض 
• بكرر العملية لحين انتهاء كل الكور
• بدخلها الفريزر ربع ساعة 
• بحمي الزيت الغميق كتير منيح عالنار وبقلي الكور (ضروري يكون الزيت غميق ويغمر الكور وحامي عشان ماتفرط الكور منا )
• وصحتين ومية عافية

حلقات البصل المقرمشة

المقادير:

• حبتين بصل حجم كبير 
• طحين(دقيق)
• بيكنج باودر 
• نشا 
• ببريكا 
• نص مكعب ماجي مبشور 
• ماء

الطريقة:

• نقطع البصل لحلقات تكون عريضه وسميكه نوعا ما وبنفرق كل حلقة عن التانيه 
• بوعاء بنضع الطحين مع الببريكا والماء وبنخلط لحت نحصل على قوام سميك بيشبه خليط الكيك
• بنسقط حلقات البصل بالوعاء السابق 
• بوعاء تاني بنضع الطحين مع النشا ومعلقة صغيره بيكنج باودر والماجي المبشور 
• على النار بنحمي الزيت ليسخن 
• ببدا أخد حلقات البصل وبغطسها بالطحين وعلى الزيت فورا لتنقلى 
• وبس نحصل على لون دهبي بنطلعهم على شبك لحتى يتصفو منيح من الزيت ويحافظو على قرمشتهم وصحتين ومية عافية