الثومية

ألذ طبق جانبي بيتقدم جنب الدجاج المشوي والشاورما والشيش طاووق .

المقادير:

• 2 الى 3 ضرس ثوم (بتزيدو أو بتقللو الكمية حسب مابتفضلو)
• حبة بطاطا صغيرة مقطعة ومسلوقة.
• نص علبة لبن زبادي .
• زيت ذرة .
• ملح 
• ليمون.

الطريقة:

• بالخلاط بضيف الثومة المهروسة واللبن والبطاطا والملح وعصرة نص ليمونه بخلطهم لحتى ينخلط الخليط.
• ضروري مراعاة هاي الخطوة لحتى يزبط  المزيج ومايفرط ..والخلاط شغال ببدأ أضيف خط رفيع من الزيت لحتى تلاحظي انو الخليط صار سميك نوعا ما وجمد معاكي .
• طبعا بتنزلي الخليط بعلبة وبتحفظيه بالثلاجه لوقت الاستخدام.
• الخليط هاد بيقعد معك لمدة 10 أيام وتذوقي أطيب ثومية ممكن تعمليها من تحت ايديكي.

شكن بيتزا

ساندويش يجمع الدجاج مع نكهة البيتزا وتوابعها خفيف بطريقة التحضير لمن يجد الصعوبة بتحضير العجين للبيتزا، جربوه راح تدمنوه.

المقادير:

• صدور دجاج منظفة ومقطعة شرايح رفيعة .
• فلفل رومي ملون مقطع شرايح.
• فطر معلب مقطع.
• زيتون أسود مقطع .
• بصلة مقطعة مكعبات صغيرة.
• صلصة .
• بهارات: أوريغانو بصل بودرة ثوم بودرة بهار البيتزا بابريكا ملح فلفل أسود.
• مثلث جبنة.
• جبنة موزريلا أو أي نوع متوفر عندك.

الطريقة:

• بتبل قطع الدجاج بالبهارات وبتركها ساعة لتاخد من الطعم.
• بمقلاة على النار بقلب البصلة بزيت الذرة لحتى تدبل وبضيف قطع الدجاج وبقلبهم لحتى الاستواء.
• بضيف الفلفل الرومي وبقلب وبعدين الفطر .
• بضيف معلقة الصلصة وبقلبهم مع بعض وبضيف ربع كاسة ميا ليتكون معي صوص خفيف وبضيف مثلث الجبنة (بتفرق بالطعم جربوها).
• آخر شي بضيف الزيتون.
• بحشي الخليط بالصامولي(الفينو) وبرش على الوجه الجبنة وبدخلها الفرن لتسيح الجبنة وتاخد لون خفيف.
• تقدم بجانب البطاطا المقلية.

فاصوليا خضرا بالطحينة

تعددت طرق طبخ الفاصوليا ومن ضمنها  الفاصوليا الخضرا بالبندورة ..لكن المره هاي حبيت أغير بطريقة طبخها وكالعادة بحب أجرب شي جديد

وعملتها مع الطحينة البيضا والليمون وكانت النتيجة لذيذة

المقادير:

• نص كيلو فاصوليا خضرا مغسولة ومقمعه ومقطعه .
• لحمة عجل مقطعة مكعبات.
• طحينة بيضاء
• بصلة مقطعة ناعم.
• عصير ليمون.
• ملح.

الطريقة:

• تسلق اللحمة مع المطيبات (ورق الغار وحب هان وبصلة صغيرة).
• بطنجرة تانيه بقلب البصلة بزيت الذرة لحتى تدبل وبضيف عليها الفاصوليا .
• بضيف اللحمة ومرقتهاعلى الفاصوليا وبتركها عشر دقايق على نار عاليه وبعدين بوطي لحتى تستوي. 
• بحل الطحينة مع ميا وبزبط الملح والليمون وبضيفها على الفاصوليا وبتركها عشر دقايق لحتى تتسبك مع الفاصوليا.
• بقدمها مع الرز الابيض وصحتين وعافية.

شوربة العدس بالكاري مع الخبز الهندي

المقادير للشوربة:

• كوب عدس مجروس مغسول كتير منيح ومصفى.
• بصلة مفرومه ناعم.
• جزرة مبشورة.
• حبة بطاطا مقطعه مكعبات.
• معلقة كبيرة صلصة طماطم.
• 2 حبة بندورة مقطعة صغير.
• معلقة صغيرة كاري.
• معلقة صغيرة كمون بودرة.
• معلقة صغيرة كركم.
• مكعب مرق دجاج.
• ماء.

الطريقة:

• بطنجرة على النار بدبل البصله وبضيف الجزر والبطاطا وباقي المكونات وبقلبهم مع بعض.
• وبضيف البهارات والمكعب والميا الساخنه وبتركها لتستوي على النار 
• بقدمها من غير تنعيم على الخلاط .

بالنسبة لمقادير الخبز الهندي:

• 3 كوب طحين .
• ربع كوب زيت ساخن .
• معلقة كبيرة حبة البركة.
• معلقة صغيرة نشا.
• ربع معلقة ملح 
• ماء حسب الحاجة للعجينة ..

الطريقة:

• بضيف المقادير الجافة مع بعض بوعاء وبخلطهم مع بعض .
• بسكب الزيت الساخن على الخليط وبمعلقة خشب بقلب المزيج حتى يتشرب الطحين كمية الزيت .
• ببدأ اضيف الماء الدافي لحتى تتشكل معي عجينة وبعجنها كتير منيح وضروري تكون العجينة معنا يابسه شوي مو طرية.
• بغطي العجينة وتترك لترتاح نص ساعة .
• تقسم العجينة الى كرات صغيرة وترق بشكل رقيق على سطح مدهون بقليل من الزيت .
• تقلى بزيت ساخن وغزير حتى ياخد اللون الدهبي.
• يقدم بجانب شوربة العدس

بسبوسة اللوتس

المقادير:

• 1/2 كوب معياري لبن زبادي 
• 1 كوب سميد ناعم او خشن 
• 1/2 كوب زيت ذرة 
• 1/2 كوب سكر بني (بامكانك استبداله بالسكر الابيض متل ما انا عملت) 
• 2 حبة بيض. 
• 1معلقة صغيرة فانيلا . 
• 1معلقة صغيرة بيكنج باودر. 
• 2 معلقة كبيرة زبدة اللوتس. 
• معلقة طحينة لدهن القالب. 
• رشة ملح.

للتزيين: 5 ملاعق زبدة اللوتس (استخدمت النوع الكرنشي منها)

الطريقة:

• نخفق المكونات السائلة جيدا بالمضرب اليدوي حتى تختلط 
• نضيف البيض والفانيلا ونخفق 
• نضيف السميد والسكر والبيكنج باودر والملح ونخلط حتى تتجانس المكونات 
• ندهن القالب بالحينة (مقاس 19 انش) ونسكب الخليط 
• تدخل في فرن محمى مسبقا على درجة حرارة 180 مئوية بالرف الوسط وتترك لتنضج مابين (15-20) دقيقة. 
• تترك لتبرد تماما وتخرج من القالب وتزين بكريمة اللوتس بعد تذويبها بالمايكرويف 
• تقطع شرحات من الفراولة فوقها وصحتين ومية هنا

لفائف الصاج المقرمشة

طبق جديد وتغيير عن المألوف ولذيذ جدا

المقادير:

• نص كيلو صدور دجاج منظفة ومقطعه شرائح .
• فلفل رومي ملون مقطع شرائح.
• زيتون أسود مشرح.
• جبنة موزاريلا (حسب المتوفر ضيفي للحشوة).
• بصل مقطع جوانح.
• فطر معلب.
• بهارات(بصل بودرة وثوم بودرة وببريكا حلوةوبهار الدجاج )وطبعا الملح والفلفل الاسود.
• بيض.
• قسماط(قرشلة مطحونه).
• فراشيح الصاج .

الطريقة:

• بتبل الدجاج بالبهارات المذكورة وبتركها ساعه على الأقل لتاخذ النكهة (طبعا أنتي فيكي تتحكمي بالتتبيل على حسب ذوقك).
• بمقلاة على النار بسخنها وبضيف زيت الذرة وبعدين قطع الدجاج بتركها تستوي وبضيف عليها البصل وبخليه لياخد تشويحة 
• بضضيف الفلفل الرومي وبقلب ليدبل شوي وبضيف الفطر واآخر شي قبل ما أطفي النار بضيف الزيتون وتقليبه خفيفة وبطفي النار .
• بترك الحشوة لتبرد تماما .
• بفرد الصاج وبضيف عليها رشة الجبنة وفوقها الحشوة وكمان مرة رشة جبنة وبلفها رول مع مراعاة تسكير الجوانب بدخلها لجوة .
• بخلص كل الكمية وبصحن بخفق البيض مع رشة ملح وفلفل أسود وبصحن تاني بضيف القسماط .
• باخد رول الصاج وبغمسو بالبيض وبعدين بالبقسماط وبضغط عليه كتيرر كويس لحتى يتغلف كل الرول .
• برفعهم بالفريزر مدة 10 دقايق قبل القلي (ضروري هاي الخطوة ).
• بمقلاة فيها زيت غزير بقليهم لحتى ياخدو اللون الذهبي الحلو.
• تقدم بجانب البطاطا المقلية والثوميه.

زيتون بانيه

الزيتون المقلي يعتبر من المقبلات اللذيذة جدا

المقادير:

• علبة زيتون اخضر حبة كامله منزوع النوى
• بيضة
• قسماط
• طحين

الطريقة:

• بصفي الزيتون من المادة الحافظة وبغسلو كتير منيح
• بتركو بالمصفاية لحتى يتصفى
• بصحن فيه الطحين ببدا اضيف كل الزيتون
• في صحن تاني بخفق البيضة مع ملح وفلفل اسود وبضيف حبات الزيتون عليه وبرفعهم على البقسماط
• بمقلاة على النار فيها زيت الذرة بتركها تحمى منيح وبقلي فيها الزيتون بس في خطوة اساسية لازم تنعمل (الزيتون بنحط بالفريزر اقل شي نص ساعه عشان وقت القلي مايفك القسماط منو)

وبقدمو بالصحن وصحتين وعافية